Інтрыга дня: вызначыліся імаверныя супернікі Беларусі па новым футбольным турніры — Лізе нацый
Сёння ў швейцарскай Лазане а 14:00 пройдзе лёсаванне новага футбольнага турніру — Лігі нацый. Усе еўрапейскія зборныя падзеленыя на дывізіёны А, В, С, D. Новы турнір уводзіцца паралельна з адборачным турнірам УЕФА, у тым ліку каб прыцягнуць больш увагі да матчаў зборных
У А трапілі 12 наймацнейшых зборных, згодна з рэйтынгам: Германія, Партугалія, Бельгія, Іспанія (кошык 1), Францыя, Англія, Швейцарыя, Італія (кошык 2), Польшча, Ісландыя, Харватыя, Нідэрланды (кошык 3). Будзе тры групы па чатыры каманды. Гульні ўвосень
Беларусь лічыцца адной з самых слабых зборных на кантыненце (42-е месца з 55 магчычых), таму трапіла ў дывізіён D, добра, што ў самы моцны кошык:
Кошык 1: Азербайджан, Македонія, Беларусь, Грузія;
Кошык 2: Арменія, Латвія, Фарэры, Люксембург;
Кошык 3: Казахстан, Малдова, Ліхтэнштэйн, Мальта;
Кошык 4: Андора, Косава, Сан-Марына, Гібралтар.
Удзельнікаў разаб'юць на чатыры групы па чатыры каманды. Матчы пройдуць увосень, як праходзяць традыцыйныя гульні зборных: па дзве гульні на тыдзень у кожны з месяцаў.
Згодна з рашэннем выканкама УЕФА, Азербайджан і Арменію развядуць па розных групах. Таксама ў сувязі з высокімі транспартнымі выдаткамі у групу можа трапіць толькі адна пара з гэтага спісу: Андора і Казахстан, Фарэры і Казахстан, Гібралтар і Казахстан, Гібралтар і Азербайджан.
Пераможцы груп пяройдуць у лігу C.
Чатыры лепшых па рэйтынгу зборных з тых, хто не выйшаў на ЕЎРА-2020 (там будзе класічны адборачны турнір) у сакавіку 2020 года разыграюць адну пуцёўку на чэмпіянат Еўропы ў стыкавым турніры.
Г.зн. беларусам могуць трапіцца па камандзе з кошыка 2, 3 і 4: напрыклад, склад групы будзе такі: Беларусь, Латвія, Казахстан, Косава.