Старшыня СК Расіі прапанаваў увесці геномную рэгістрацыю працоўных мігрантаў
Ён мяркуе, што такім чынам будзе большы кантроль над міграцыйнымі працэсамі, а таксама будзе дадатковы бар'ер перад крымінальнымі элементамі.
medrussia.ru
Старшыня Следчага камітэта Расіі Аляксандр Бастрыкін прапанаваў увесці абавязковую геномную рэгістрацыю ўсіх працоўных мігрантаў, якія ўязджаюць у Расію з краін блізкага замежжа.
«Такія меры сур'ёзным чынам зробяць больш жорсткім кантроль над міграцыйнымі працэсамі, дазволяць паставіць дадатковы бар'ер пранікненню на наш рынак працы крымінальных элементаў, а праваахоўным органам — больш паспяхова раскрываць учыненыя імі злачынствы», — патлумачыў ён сваю ініцыятыву ў інтэрв'ю «Інтэрфаксу».
Паводле звестак кіраўніка СК, за першае паўгоддзе 2020 года ў Расеі было расследавана больш за 17 тысяч злачынстваў, учыненых замежнікамі, а за аналагічны перыяд 2021 года — амаль 19 тысяч злачынстваў.
Геномная рэгістрацыя — гэта атрыманне, захоўванне i выкарыстанне біялагічнага матэрыялу, які змяшчае фрагменты ДНК, якія дазваляюць ідэнтыфікаваць чалавека.