Крыніцай заражэння 90% расіян штамам каранавіруса «дэльта» стаў адзін чалавек
90% усіх выпадкаў заражэння штамам каранавіруса «дэльта», выяўленых у Расіі, адбыліся з-за аднаго варыянта — AY.122, завезенага ў краіну адным чалавекам вясной 2021 года.
Пра гэта гаворыцца ў працы расійскіх навукоўцаў. Коратка пра яе распавёў адзін з аўтараў, прафесар Сколкаўскага інстытута навукі і тэхналогій Георгій Базыкін, піша meduza.io.
Больш за 90% выпадкаў «дэльты» у Расіі — падобна на тое, што нашчадкі аднаго-адзінага віруса, завезенага сюды вясной. Калі вы заразіліся кавідам у Расіі гэтым летам або восенню — напэўна, вы хварэлі менавіта на гэты варыянт, гаворыцца ў паведамленні.
Па словах Базыкіна, варыянт AY.122 па сваіх уласцівасцях не адрозніваецца ад іншых разнавіднасцяў «дэльты».
«Відаць, справа ў эфекце заснавальніка», — сказаў Базыкін. Ён адзначыў, што і да і пасля завозу AY.122 у Расіі выяўлялі іншыя завезеныя ў краіну варыянты дэльты, але яны «не мелі канкурэнтнай перавагі» ў параўнанні з гэтым варыянтам.
