Жыхар Докшыцкага раёна знайшоў у бервяне паўметровую статуэтку Ісуса Хрыста ФОТА
Паўметровую драўляную статуэтку Ісуса Хрыста знайшоў у бервяне зруба жыхар аграгарадка Ваўкалата Павел Кімстач. Яна выдатна захавалася і не мае ніякіх пашкоджанняў, хаця драўніна вакол яе схованкі была паедзена шашалем, пішуць «Родныя вытокі».
Два гады таму мужчына перавёз бярвёны з закінутых сядзіб у суседняй вёсцы: з часам меў намер парэзаць іх на дровы. Калі пілаваў адно з бярвёнаў, раптам з сярэдзіны дрэва выкацілася на снег ярка расфарбаваная драўляная статуэтка Ісуса Хрыста.
Выемка ў дрэве для размяшчэння статуэткі, зразумела, была зроблена спецыяльна. Старажылы сцвярджаюць, што раней у вёсцы было шмат пажараў, і таму, узводзячы дамы і гаспадарчыя пабудовы, людзі закладвалі ў падмуркі, сцены або дахі своеасаблівыя абярэгі ад агню. Мабыць, такі абярэг і знайшоў мясцовы жыхар. Цяпер маленькая святыня заняла пачэснае месца ў новым доме і, вераць гаспадары, гэтак жа будзе аберагаць ад злога і іх жытло.