«Спазніўся на працу недзе на 30 хвілін». Мінчукі расказваюць, як дабіраюцца на працу пасля абвалу моста на Нямізе
Пасля таго, як на Нямізе абрынулася частка моста, пуцеправод дэмантавалі цалкам. Адпаведна, змяніліся маршруты руху як для аўтамабіляў, так і для грамадскага транспарту. Мінчукі расказалі «Нашай Ніве», як цяпер дабіраюцца на працу (спойлер: большасць — з праблемамі).
Фота: тут і далей фота «Мінск-Навіны»
«Раніцай ехала з Вяснянкі да Нямігі на працу. Звычайна дарога займае каля 15-20 хвілін. Але сёння толькі прамежак ад Мельнікайце да Раманаўскай Слабады ехалі каля 20 хвілін, — скардзіцца чытачка. — Нумар аўтобуса —1.
Вельмі дрэнна, што аўтобус цяпер не спыняецца каля метро Фрунзенская. У выніку ён перад Раманаўскай Слабадой стаў мёртва ў заторы і высадзіў людзей яшчэ да скрыжавання. На працу паспела літаральна ўпрытык, хоць села ў аўтобус у 8:12.
Для мяне ў цэнтр горада іншага транспарту няма. Працую на Нямізе, таму мне наогул без варыянтаў. Толькі 1-ы аўтобус і застаўся.
Калі ехаць да метро, то можна яшчэ на 10-м тралейбусе да станцыі «Пушкінская». Але метро таксама не зусім мне зручнае, таму што тут праход пад мостам зачынены, і прыйдзецца ад метро рабіць крук да Палаца спорту, а потым вяртацца назад.
На працы асабіста мой кіраўнік увайшла ў становішча і разумее, што я магу спазніцца не па сваёй віне. Але прайшоў слых сёння ў офісе, што калі рамонт зацягнецца надоўга, то кіраўніцтва кампаніі будзе шукаць новы офіс. Бо яны прыязджаюць на сваіх аўтамабілях, а цяпер не праехаць.
Каб выправіць сітуацыю, на маю думку, трэба зрабіць для грамадскага транспарту выдзеленую паласу па Раманаўскай Слабадзе. Гэта б вырашыла праблему, не прыйшлося б стаяць у заторах».
Другі чытач таксама скардзіцца на заторы.
«Я ехаў з Лебядзінага ва Уручча. Участак ад прыпынку «Гвардзейская» і да наступнага прыпынку праязджаў вельмі доўга, — кажа мужчына. — Асноўны затор быў ад перасячэння Мельнікайце з Гарадскім валам. Там мы стаялі каля 20-25 хвілін. У выніку я дабіраўся на працу на паўгадзіны даўжэй, чым звычайна. Не разумею, чаму 1-ы аўтобус не можа спыніцца каля станцыі метро «Фрунзенская», навошта без прыпынкаў вязе да вакзала? Бо амаль 20 хвілін мы стаялі ў заторы ў раёне метро «Фрунзенская».
Раней я ездзіў на 1-м аўтобусе да плошчы Свабоды, потым ішоў у метро на Кастрычніцкую, бо мне патрэбная «Маскоўская лінія» метро. А цяпер пасля «Гвардзейскай» наступны прыпынак — «Гарадскі вал», гэта як пераехаць ужо Макдональдс. Толькі бяда ў тым, што ты 20-25 хвілін знаходзішся ў заторы, каб туды дабрацца.
Цяпер я б з задавальненнем выйшаў на «Фрунзенскай», там бы ўжо ці праз трэцюю лінію або класічным чынам перайшоў на сваю «Маскоўскую» лінію, але аўтобусы проста не высаджваюць там пасажыраў.
У выніку я спазніўся на працу недзе на 30 хвілін. Незразумела чаму нельга арганізаваць прыпынак каля метро «Фрунзенская»? Тады б мой графік застаўся прыкладна такім жа, спадзяюся, з часам прыпынак там з’явіцца.
У мяне ёсць іншы варыянт, як дабірацца: даехаць да Камароўкі, адтуль на метро. Але там далекавата да станцыі, ды і сёння бачыў, што там таксама быў затор, ад Стэлы і да Машэрава».
Праўда, некаторым сітуацыя падабаецца.
«Еду на працу з Зялёнага Луга да Мяснікова. Пасля абвалу моста на Нямізе даводзіцца прайсці пешшу каля кіламетра, бо канчатковы прыпынак 29-га тралейбуса змясцілі да Опернага тэатра. Але, нягледзячы на нязручнасці, мне ўсё роўна падабаецца, цэнтр значна прыемнейшы без аўтамабіляў. Замест тысяч машын ідзеш разам з сотнямі і тысячамі людзей па ціхім цэнтры.
Час на дарогу павялічыўся, але нязначна. Калі раней да цэнтра дабіраўся хвілін за 40 гэтым транспартам, то цяпер з улікам таго, што неабходна частку прайсці пешшу, атрымліваецца хвілін 50. Транспарт (так выглядае) стаў хадзіць часцей за кошт скарачэння маршруту», — кажа іншы чытач.
Нагадаем, кіраўнік Мінгарвыканкама Уладзімір Кухараў паабяцаў, што новы мост пабудуюць цягам месяца. А па факце абрушэння старога пуцеправода Следчы камітэт завёў крымінальную справу.
