Чай падаражаў амаль на 40%, гародніна не адстае. Як змяніліся цэны на прадукты за апошнія месяцы?
У канцы студзеня ўлады пачалі рэгуляваць цэны на імпартныя гародніну і яблыкі. Гэта ў дадатак да таго, што некаторыя сацыяльна значныя прадукты і так пад кантролем. Паглядзелі, як змяніліся цэны за апошнія два месяцы.
Параўноўваем з сітуацыяй на пачатку снежня. Найбольш заўважны скачок цэн на гародніну.
Айчынная цыбуля і буракі падаражэлі на 30% і 18% адпаведна. Морква стала каштаваць болей на 34%.
Цэны на 3 лютага 2022-га. Ранейшыя цэны па асобных пазіцыях мы фіксавалі таксама па «Е-дастаўцы»
Беларускай капусты ў гэтай краме ў продажы няма (хаця днямі прэм'ер Раман Галоўчанка казаў, што у нас няма дэфіцыту ўласнай гародніны). Толькі расійская па 2,99 рубля. Гэта ў паўтара раза даражэй, чым было на пачатку снежня.
Затое бульба стала таннейшая — кіло прадаюць за 1,38 рубля (гэта на 11 капеек менш, чым два месяцы таму).
Заўважна прыбавілі ў цане агуркі — плюс 73%, таматы — плюс 33%. Часнык стаў даражэйшым на 25%. Настолькі ж падскочылі ў цане яблыкі. Салодкі перац цяпер каштуе 8,99 рубля (плюс 29%).
Цэны на крупы практычна не змяніліся. Асобныя, напрыклад, грэчка і рыс, нават патаннелі на некалькі капеек. Цэны на малочныя прадукты таксама засталіся амаль такімі ж (толькі сыр прыбавіў 7%). Беларускае дзіцячае харчаванне прадаецца па тых жа цэнах, што і два месяцы таму.
Крыху менш стала каштаваць свініна. Так, грудзінка прадаецца па 11,69 за кіло (мінус 4%). Птушка ў цане прыбавіла, але нязначна, усяго 2%. А вось ялавічына падаражэла на 13%.
Марожаная рыба (мы бралі для параўнання мінтай) стала каштаваць больш на 5%.
Што істотна падаражэла, дык гэта чай. Сто грамаў ліставога цяпер каштуе 2,45 рубля — гэта плюс 38% у цане.
Чытайце па тэме:
Урад патлумачыў, чаму стаў рэгуляваць цэны на яблыкі
Замест італьянскіх чэры — таматы з Арменіі. Ці зніклі з крамаў прадукты, якія трапілі пад контрсанкцыі?
Стала вядома, каму і на якія тавары дадуць зніжку гандлёвыя цэнтры
