Рэцэпт на выхадныя: класічны французскі тарт татэн — лёгкі спосаб адчуць сябе крыху ў Парыжы

Тарт татэн — французская версія яблычнага пірага, што спалучае ў сабе смак карамелі з водарам яблыкаў і хрумсткім цестам. Лепей за ўсё падаваць гэтае смакоцце з узбітымі вяршкамі або ванільным марожаным.

Фота: BBC Food

Каб прыгатаваць тарт татэн, вам спатрэбіцца:

10—12 штук салодкіх яблыкаў
3 сталовыя лыжкі вады
100 грамаў цукру (лепей узяць дробны цукар)
60 грамаў халоднага масла, якое трэба нарэзаць кубікамі + 30 грамаў растопленага масла
300 грамаў слаёнага цеста

Раскачайце цеста да таўшчыні 3 міліметры і выражце з яго круг трохі большы за форму для выпякання (патрэбная форма дыяметрам 20 сантыметраў). Пракаліце цеста відэльцам і памясціце яго ў маразілку.
Разагрэйце духоўку да 180 градусаў.
Разрэжце яблыкі на паловы ўздоўж іх даўжыні, прыбярыце з яблыкаў скуру і насенне.
Вылійце ваду на дно формы і высыпце туды цукар. Пакіньце форму на дзве хвіліны, пакуль цукар не ўбярэ ваду.
На сярэднім агні гатуйце сіроп у форме, пакуль ён не атрымае колер бледнай карамелі. Сачыце за тым, каб у сіропе не было асадку і каб ён не набыў занадта цёмны колер, бо тады пах ад сіропу будзе мацнейшы, чым ад яблыкаў. Дадайце парубленае кубікамі масла — гэта зробіць смак тарта больш багатым. Перамяшайце.
Размяркуйце яблыкі па форме: пачынайце з яе бакоў, а потым пакладзіце ў цэнтры рэшткі яблыкаў. Важна размясціць іх у форме як мага больш шчыльна, калі трэба, прыціскайце яблыкі рукамі.
Змажце яблыкі растопленым маслам і пастаўце форму на бляху. Выпякайце яблыкі ў духоўцы 30 хвілін.
Дастаньце форму і пакладзіце на яблыкі зверху замарожанае цеста. Загніце краі цеста ўнутр у форму, і накаліце цеста вострым нажом, каб падчас прыгатавання выходзіла пара.
Памясціце будучы тарт у духоўку яшчэ на 40-45 хвілін ці пакуль цеста не стане хрумсткім і залатым.
Астуджвайце цеста пры хатняй тэмпературы на працягу гадзіны, а потым перавярніце форму і пакладзіце тарт на блюда. У выніку цеста павінна аказацца ўнізе тарта. Падавайце яго цёплым ці разагрэйце тарт перад падачай.