Беларусь працягнула бязвізавы ўезд грамадзянам Літвы і Латвіі да канца года

Мінск імкнецца такім чынам павысіць абароты гандлю і сферы паслуг у памежных рэгіёнах.

Беларусь працягнула бязвізавы ўезд грамадзянам Літвы і Латвіі да канца года, паведамляе Міністэрства замежных спраў Беларусі.

«Гэты жэст добрай волі беларускага боку стаў наглядным пацвярджэннем імкнення нашай краіны да захавання добрасуседскіх адносін з адпаведнымі дзяржавамі, далейшага развіцця міжасабовых кантактаў паміж простымі людзьмі нават ва ўмовах незаконнага санкцыйнага ціску на Рэспубліку Беларусь», — заяўляе МЗС.

Мінск імкнецца такім чынам павысіць абароты гандлю і сферы паслуг у памежных рэгіёнах. Сярэдні заробак «чыстымі» ў Літве і Латвіі ў 2,5 разу вышэйшы, чым у Беларусі, а агульныя даходы яшчэ большыя, бо ў гэтых краінах большую долю ў даходах сямей складаюць прыбыткі ад бізнэсу і прыватнай уласнасці.

Літоўцы і латышы — прывабныя кліенты для крам, аўтазаправак і сферы паслуг. Яны прыязджаюць у Беларусь па бензін, алкаголь, цыгарэты, карыстаюцца паслугамі цырульняў і стаматалогіяй.