NYT апублікавала доказы масавага забойства ўкраінцаў расійскімі вайскоўцамі ў Бучы
The New York Times апублікавала новыя доказы ваенных злачынстваў расійскіх вайскоўцаў у Бучы. Апублікаваныя відэа сведчаць, што расійскія дэсантнікі забілі 8 чалавек.
Відэа, атрыманыя The New York Times, паказваюць, што расійскія вайскоўцы забілі найменей 8 украінцаў у Бучы 4 сакавіка.
На першым відэа, якое знялі камеры відэаназірання 4 сакавіка, відаць, як вайскоўцы вядуць украінскіх цывільных (сярод іх быў мужчына ў яркай сіняй кофце). Затым яны адвялі мужчын за офісны будынак, які ператварылі ў сваю базу.
Другое відэа, якое даслалі сведкі, паказвае, што адбывалася за будынкам: былі стрэлы, пасля чаго палонныя не вярнуліся туды, адкуль іх вывелі.
На трэцім відэа, знятым з дрона 5 сакавіка бачныя целы, якія ляжаць на зямлі каля офіснага будынка, а побач з імі — два расійскія салдаты на варце. Сярод целаў заўважная пляма ярка-сіняга колеру — той самы мужчына ў сіняй кофце з першага відэа.
Раней расійскае медыя «Медуза» апублікавала відэа з дрона, знятае ў прамежку з 23 па 30 сакавіка 2022 года ў Бучы, якое даказвае, што людзі былі забітыя падчас акупацыі мястэчка расіянамі.
Расійскі бок у масавых забойствах у Бучы вінаваціць украінцаў.
