Апазіцыя ў Арменіі заблакавала прэзідэнцкі палац
У Арменіі працягваюцца акцыі пратэсту. Сёння раніцай прыхільнікі руху «Супраціў» заблакавалі палац прэзідэнта. Яны паслядоўна блакуюць розныя ведамствы. Так учора блакаваўся будынак МЗС.
Вакол палаца выстраіліся паліцэйскія. Пратэстоўцы абкружылі іх. Учора апазіцыя блакавала ўваходы ў Міністэрства замежных спраў. Акцыя працягвалася некалькі гадзін.
«Наша мэта — каб ніводзін супрацоўнік не ўвайшоў у прэзідэнцкі будынак. Чаму мы заблакавалі прэзідэнцкі палац? — бо працэс ідзе ў краіне ўжо месяц, гэта агульнанацыянальны рух, і чалавек, які сядзіць тут, адарваны ад рэальнасці», — заклікаў сваіх прыхільнікаў віцэ-спікер Нацыянальнага сходу, дэпутат ад фракцыі «Айастан» Ішхан Сагацелян, паведамляе News.am.
Армянская апазіцыя хоча дамагчыся адстаўкі прэм'ер-міністра Нікола Пашыняна. Яна не згодная з яго палітыкай у сферы ўрэгулявання карабахскага канфлікту і прымірэння з Азербайджанам.
