ЗША паставяць Украіне ракетныя сістэмы HIMARS. Чым яны адметныя
ЗША паставяць Украіне ракетныя сістэмы M142 HIMARS. Афіцыйна аб новым пакеце ваеннай дапамогі будзе абвешчана сёння. Уключэнне ў яго рэактыўных сістэм залпавага агню пацвердзіў прадстаўнік адміністрацыі прэзідэнта ЗША на спецыяльным брыфінгу.
«Гэты пакет будзе ўключаць сістэмы больш далёкага дзеяння, у прыватнасці HIMARS, а таксама боепрыпасы, якія дазволяць украінцам больш дакладна наносіць удары па ключавых цэлях у зоне баявых дзеянняў унутры Украіны, а таксама дапамогуць ім даць адпор прасоўванню Расіі», — прыводзяць словы чыноўніка інфармацыйныя агенцтвы.
У пакет дапамогі коштам 700 млн даляраў таксама павінны ўвайсці радыёлакацыйныя станцыі контрбатарэйнай барацьбы, РЛС назірання за паветранай прасторай, супрацьтанкавыя ракеты Javelin і боепрыпасы.
M142 HIMARS — амерыканская РСЗА, якая можа несці шэсць рэактыўных снарадаў або адну аператыўна-тактычную балістычную ракету ATACMS. Сістэма мантуецца на базе колавага шасі. Калібр снарадаў складае 227 мм. у залежнасці ад ужывальных боепрыпасаў далёкасць стральбы вар'іруецца ад 2 да 500 км. На 500 км можа ляцець ракета MGM-140 ATACMS з баявой часткай масай да 560 кг.