Для педагогаў увядуць «10 залатых правілаў», а школьнікаў прымусяць здаваць мабільнікі
У школах і садках будуць уключаць гімн і падымаць дзяржаўны сцяг, з 2023 года ўвядуць абавязковую школьную форму. Пра гэта распавёў міністр адукацыі Андрэй Іванец у інтэрв'ю SB.by.
Ужо з верасня ў кожнай школе на інфармацыйных стэндах з'явяцца «10 залатых правілаў педагога». Што там будзе, падрабязна не раскрываецца. Але «настаўнікі павінны пацвярджаць высокі статус адпаведным знешнім выглядам, паводзінамі ў сацсетках, правільна выбудаванай камунікацыяй з бацькамі. У адказ павінны атрымліваць паважлівае стаўленне».
Са слоў міністра адукацыі, навучэнцы будуць пакідаць мабільнікі ў спецыяльна абсталяваных месцах, іх можна будзе выкарыстоўваць толькі ў навучальных мэтах, напрыклад, пры счытванні QR-кодаў.
Кантроль за знешнім выглядам таксама будзе ўзмоцнены. Ведамства прапрацоўвае ўвядзенне з 1 верасня надыходзячага навучальнага года адзіных элементаў школьнага адзення для канкрэтнай установы. А з 2023 года магчымае ўвядзенне абавязковай школьнай формы.
Ва ўсіх школах адкрыюць музеі або музейныя пакоі.
Акрамя таго, падрыхтаваны загад, якім прадугледжанае правядзенне на пастаяннай аснове ўрачыстых лінеек з абавязковым праслухоўваннем дзяржаўнага гімна, узняццем (вынасам) дзяржаўнага сцяга ў дні дзяржаўных святаў і святочныя дні Беларусі.
«Гэта будзе адбывацца ва ўстановах дашкольнай, агульнай сярэдняй, сярэдняй спецыяльнай, прафесійна-тэхнічнай, вышэйшай адукацыі, а таксама ў летніх аздараўленчых лагерах, студэнцкіх атрадах. У школах і гімназіях будуць выконваць гімн і падымаць сцяг перад пачаткам і ў канцы кожнай чвэрці, падчас правядзення цырымоніі ўручэння дакументаў аб адукацыі. А ў летніх аздараўленчых лагерах, лагерах студатрадаў — перад пачаткам і ў канцы змены».
Праблему дэфіцыту кадраў сярод педагогаў міністр паабяцаў вырашаць павышэннем зарплаты.
Паводле яго, за студзень-красавік гэтага года ў параўнанні з такім жа перыядам мінулага сярэднямесячная зарплата, напрыклад, у настаўнікаў павялічылася на 20,2 працэнта.
