Сусветная арганізацыя аховы здароўя патлумачыла ўспышку воспы малпаў
Прычынай цяперашняй успышкі малпінай воспы стала змяненне клімату, і такія інфекцыі ў свеце будуць з'яўляцца ўсё часцей.
Да такой высновы прыйшоў дырэктар праграмы СААЗ па надзвычайных сітуацыях Майкл Раян.
Паводле яго слоў, змяненне клімату спрыяе хуткай змене ўмоў надвор'я. Гэта прыводзіць да засухі, а жывёлы і людзі мяняюць свае паводзіны. Вынікам такіх перамен становіцца тое, што характэрныя для жывёл хваробы пачынаюць перадавацца людзям.
На думку Раяна, імавернасць узнікнення інфекцый, такіх як воспа малпаў і ліхаманка Ласа, і рызыкі іх распаўсюджвання ў сучасным свеце ўзрастаюць.
Воспа малпаў прадстаўляе сабой рэдкае віруснае захворванне, якое можа перадавацца людзям ад грызуноў і прыматаў. Яго сімптомы — ліхаманка, галаўны боль, а таксама высыпанні на твары і іншых частках цела. Па падліках Сусветнай арганізацыі аховы здароўя, каэфіцыент смяротнасці пры ўспышках воспы малпаў не перавышае 10%.
Па апошніх звестках, пацверджана больш за 550 выпадкаў захворвання на воспу малпаў у 30 краінах свету. Нядаўна зафіксаваная першая смерць (у Нігерыі). У Беларусі пакуль выпадкаў захворвання не зафіксавана.