Знайсці
03.06.2022 / 17:15РусŁacБел

Макей паскардзіўся на польскую памежную сцяну ў ЮНЕСКА

Міністр замежных спраў Беларусі Уладзімір Макей звярнуўся да кіраўнікоў нацыянальных камісій па справах ЮНЕСКА замежных краін і выказаў крайнюю занепакоенасць у сувязі з будаўніцтвам Польшчай памежнай сцяны на тэрыторыі Белавежскай пушчы, паведамілі ў эфіры СТБ.

Фота: Твітар Польскай памежнай варты

Па словах Макея, будаўніцтва плота пагражае сур'ёзнымі і непазбежнымі наступствамі. На мяжы, дзе польскі бок узводзіць агароджу, ужо, маўляў, зафіксаваныя шматлікія факты гібелі жывёл, нагадаў Макей і выказаў меркаванне, што ў будучыні іх колькасць ўзрасце.

«Беларусь заклікае Польшчу спыніць будаўніцтва сцяны на тэрыторыі аб'екта Сусветнай спадчыны і звяртаецца да міжнароднай супольнасці з просьбай падтрымаць пазіцыю афіцыйнага Мінска ў гэтым пытанні», — гаворыцца ў паведамленні.

Макей таксама заявіў, што, нягледзячы на неаднаразовыя запыты Беларусі, Польшча да гэтага часу так і не падала інфармацыю пра дэталі будаўніцтва сцяны і ацэнку яе ўздзеяння на Белавежскую пушчу.

На ягоную думку, гаворка ідзе пра беспрэцэдэнтнае парушэнне Польшчай палажэнняў Канвенцыі аб ахове сусветнай культурнай і прыроднай спадчыны, згодна з якой дзяржаве-ўдзельніцы варта прымаць усе неабходныя меры для забеспячэння аховы і захавання культурнай і прыроднай спадчыны, размешчанай на яе тэрыторыі.

Польшча прыступіла да ўзвядзення агароджы на мяжы з Беларуссю ў студзені. Плот уяўляе сабой масіўную загараджальную канструкцыю з бетону і металу на польска-беларускай мяжы, ён будзе мець даўжыню 186 км і вышыню 5,5 метра.

Будаўніцтва агароджы звязанае з неабходнасцю супрацьстаяння міграцыйнаму крызісу, штучна арганізаванаму беларускімі ўладамі ў 2021 годзе з мэтай палітычнага ціску на заходнія краіны.

Чытайце таксама: 

Польскія памежнікі паказалі, як цяпер выглядае плот на мяжы з Беларуссю

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера