Журналісты Reuters трапілі пад абстрэл па дарозе ў Севераданецк. Іх кіроўца загінуў
Аўтамабіль з журналістамі трапіў пад абстрэл у пятніцу 3 чэрвеня, калі накіроўваўся ва ўсходнеўкраінскі горад Севераданецк, за які ідуць жорсткія баі. Пра гэта паведаміла Reuters.
Фатограф Аляксандр Ермачэнка і аператар Павел Клімаў ехалі ў аўтамабілі, прадастаўленым прарасейскімі сіламі, па ўчастку дарогі паміж Севераданецкам і горадам Рубежнае, у 10 км на поўнач. Гэты адрэзак утрымлівае Расія.
Агенцтва Reuters не змагло хутка высветліць асобу кіроўцы, якога сепаратысты прапанавалі агенцтву для паездкі. Міністэрства абароны Украіны не адказала на тэлефонны званок з просьбай пракаментаваць сітуацыю.
Ермачэнку і Клімава даставілі ў бальніцу ў Рубежнае, дзе ім аказалі першую дапамогу. У Ермачэнкі — аскепкавае раненне, у Клімава — пералом рукі.
«Reuters выказвае свае глыбокія спачуванні сям'і кіроўцы ў сувязі з іх стратай», — гаворыцца ў заяве прадстаўніка Reuters.