Казахстан ператворыцца з суперпрэзідэнцкай у прэзідэнцка-парламенцкую рэспубліку — вынікі рэферэндуму
ЦВК Казахстана назваў папярэднія вынікі канстытуцыйнага рэферэндуму. Змены ў Канстытуцыю краіны падтрыманыя большасцю выбаршчыкаў, якія ўдзельнічалі ў плебісцыце.
tengrinews.kz
Як паведаміў на брыфінгу старшыня ЦВК Нурлан Абдзіраў, яўка на рэферэндуме склала 68,06%. На ўчасткі прыйшлі 8 млн выбаршчыкаў з 11,7 млн унесеных у спісы, паведамляе reform.by.
За змяненне Канстытуцыі прагаласавалі 77,18% або 6,16 млн чалавек.
Супраць змены асноўнага закона выступілі 18,66% выбаршчыкаў, або 1,49 млн чалавек.
Праект Канстытуцыі прадугледжвае забарону на смяротнае пакаранне, членства ў палітычных партыях для прэзідэнта, суддзяў, членаў ЦВК, сілавікоў і некаторых іншых катэгорый служачых. У ім дэкларуецца, што зямля, яе нетры і прыродныя рэсурсы належаць народу, а не дзяржаве, як раней. Дзяржава ад імя народа ажыццяўляе права ўласнасці.
Паўнамоцтвы прэзідэнта скарачаюцца. Уводзіцца прамая забарона на займанне дзяржаўных пасад і публічных пасад для яго найбліжэйшых сваякоў. Выбары ў Казахстане будуць праходзіць па змяшанай сістэме: 70% парламента будуць абірацца па партыйных спісах, астатнія — у індывідуальных акругах. Усяго ў Канстытуцыю прапанавана 56 паправак, яны закранаюць траціну артыкулаў.
У выніку Казахстан павінен ператварыцца з суперпрэзідэнцкай Рэспублікі ў прэзідэнцка-парламенцкую.
