Зяленскі: Украіна не гатовая разглядаць варыянт экспарту збожжа праз Беларусь
Прэзідэнт Украіны Уладзімір Зяленскі ў размове з журналістамі заявіў, што Украіна не гатовая разглядаць пытанне экспарту ўласнага збожжа праз Беларусь.
«Што тычыцца Беларусі: гэтая інфармацыя адкрытая. Нам прапаноўвалі ехаць праз Беларусь чыгункай. Мы нават не разумеем, які аб'ём.
Але мы разумеем, для чаго нам гэта прапаноўвалі. Мы пакуль не гатовыя ісці па гэтым фармаце і дапамагаць нашым «дружалюбным» суседзям», — сказаў Зяленскі.
Паводле яго, прапанова ўладаў РБ па транзіце збожжа з Украіны ў парты краін Балтыі выглядае даволі прывабна, але ў Офісе прэзідэнта Украіны выдатна разумеюць сітуацыю. Вагоны з украінскім збожжам пасля трапляння на тэрыторыю Беларусі будуць, на думку Зяленскага, «экспрапрыяваныя».
А найлепшымі гарантыямі разблакоўкі ўкраінскіх партоў для вывазу збожжа ўкраінскі прэзідэнт назваў супрацькарабельныя сістэмы, якія пастаўляюцца ў краіну з-за мяжы.
«Мы працуем над гэтым і атрымаем супрацькарабельныя сістэмы. Гэта не пагрозы. Гэта будуць самыя найлепшыя гарантыі».
