Bellingcat: Адзін з брытанцаў, асуджаных у «ДНР» да смяротнага пакарання, мае ўкраінскае грамадзянства
Так званы «Вярхоўны суд ДНР», падкантрольны Крамлю, 9 чэрвеня асудзіў трох палонных замежнікаў, якія ваявалі ў складзе УСУ, да смяротнага пакарання. Адзін з брытанцаў, асуджаных у акупаваным Данецку, за «наёмніцтва» і «тэрарызм», зʼяўляецца ўкраінскім грамадзянінам, паведаміў у Twitter заснавальнік расследавальнай групы Bellingcat Эліёт Хігінс.
Эйдэн Эслін. Фота: AP
«Эйдэна Эсліна і Шона Пінэра асудзілі да смяротнага пакарання пасля «паказальнага суда» ў акупаванай Расіяй Украіне. Заўважце, хоць расійскія ўлады сцвярджаюць, што Эслін быў наймітам, на самай справе ён быў вайскоўцам Украіны і грамадзянінам Украіны», — напісаў журналіст-даследчык.
Aiden Aslin and Shaun Pinner sentenced to death after ‘show trial’ in Russian-occupied Ukraine. Note while Russian authorities claim Aslin was a mercenary he was actually a member of the Ukrainian military and a Ukrainian citizen. https://t.co/NxOZisBXir
Асуджаныя да смяротнага пакарання брытанцы — Шон Пінэр і Эйдэн Эслін, а таксама грамадзяніна Марока Саадун Брагім — падпісалі кантракты з УСУ да пачатку поўнамаштабнага ўварвання РФ ва Украіну.
Іх абвінавацілі па чатырох артыкулах Крымінальнага кодэкса «ДНР»: «здзяйсненне злачынства групай асоб», «гвалтоўны захоп улады або гвалтоўнае ўтрыманне ўлады», «наёмніцтва» і «праходжанне навучання ў мэтах ажыццяўлення тэрарыстычнай дзейнасці».
Ім далі месяц на тое, каб абскардзіць прысуд. Усе трое пацвердзілі сваё рашэнне падаць апеляцыю.