МЗС Расіі нагадаў аб праве Сафіі Сапегі прасіць пра памілаванне
Расіянка Сафія Сапега, якую асудзілі да шасці гадоў пазбаўлення волі, можа падаць Аляксандру Лукашэнку прашэнне аб памілаванні, паведамілі ў МЗС Расіі.
«Згодна з дзеючым беларускім заканадаўствам, Сафія Сапега мае права падаць хадайніцтва пра памілаванне і вызваленне ад крымінальнай адказнасці як асоба, што «спрыяе раскрыццю злачынстваў і ліквідацыі наступстваў іх здзяйснення». Разгляд такіх зваротаў уваходзіць у кампетэнцыю прэзідэнта Беларусі», — гаворыцца ў паведамленні.
У расійскім МЗС адзначылі, што пры прыняцці такога рашэння ўлады ўлічваюць ступень грамадскай небяспекі зробленага, наяўнасць раскаяння і прызнанне віны з боку асуджанага, супрацоўніцтва са следствам, і пагашэнне ўсіх накладзеных штрафаў.
Сапегу затрымалі 23 мая 2021 года разам з былым галоўным рэдактарам тэлеграм-канала «Нехта» Раманам Пратасевічам у выніку пасадкі ў Мінску самалёта Ryanair Афіны — Вільня.
Першапачаткова абвінавачванне было выстаўленае па сямі артыкулах КК Беларусі, у тым ліку аб распальванні варожасці, арганізацыі пагроз сілавікам і суддзям, перашкодзе працы журналіста, незаконным зборы асабістых даных. Але Сапегу прызналі вінаватай паводле двух артыкулаў: аб распальванні варожасці і незаконным зборы даных аб прыватным жыцці.
