На рэабілітацыю камерцыйнага дырэктара «Крумкачоў» Юрыя Турэйкі сабралі больш за 10 тысяч рублёў
За тыдзень прадалі 626 квіткоў і сабралі больш за 10 тысяч рублёў для сям'і камерцыйнага дырэктара «Крумкачоў» Юрыя Турэйкі. Дабрачынны матч з «Іслаччу» наведалі 770 чалавек, паведамляе сайт каманды.
«Мы яшчэ раз пераканаліся ў сіле слова і ў тым, што побач з «Крумкачамі» знаходзяцца людзі, якія заўсёды гатовыя адгукнуцца на просьбу, якія гатовыя дапамагчы і падтрымаць», — піша клуб.
Усю выручку ад продажу білетаў на матч клуб адправіць сям'і Юрыя.
1 мая Юрый Турэйка каментаваў гульню «Крумкачы» — «Энергетык-БДАТУ», і проста падчас матча ў яго здарыўся інсульт. Са стадыёна яго забрала хуткая. Быў яшчэ адзін інсульт у бальніцы, потым інфаркт, два тыдні комы і больш за месяц у рэанімацыі. Юрый выжыў. Але цяпер патрэбная цяжкая рэабілітацыя.
Падтрымаць сям'ю Турэйкаў можна па спасылцы.
