Ва Украіне пачалі збіраць грошы на «Армію дронаў»
Аб праекце па зборы грошай на цэлую «Армію дронаў», які праводзіцца сумесна з Генштабам украінскіх Узброеных сіл і фандрэйзінгавай платформай United24 паведаміў віцэ-прэм'ер, міністр лічбавай трансфармацыі Міхаіл Фёдараў.
Дрон Bayraktar TB 2. Фота: АрмiяInform
«Мы сфармавалі сістэмнае бачанне, каб усю лінію фронту шырынёй каля 2470 км закрыць дронамі, — піша Фёдараў. — Яны дазволяць маніторыць дзеянні ворага, мяняць ваенныя стратэгіі і захаваць як мага больш жыццяў вайскоўцаў. У гэтым ім дапаможа тэхналагічная «Армія дронаў».
Ужо былі пратэставаныя «розныя дроны». На першым этапе будзе набыта 200 беспілотнікаў, якія «могуць лятаць да 24 гадзін на адлегласць 160 км і пры гэтым заставацца амаль незаўважнымі для ворага».
Комплексная праграма з UNITED 24 дазволіць украінцам не толькі закупляць дроны, але і рамантаваць іх, аператыўна мяняць, а таксама праводзіць навучанне пілотаў.
