Палітвязня Андрэя Новікава чатыры месяцы ўтрымлівалі ў адзіночнай камеры
Па інфармацыі праваабаронцаў, палітвязня Андрэя Новікава адміністрацыя бабруйскай калоніі на чатыры месяца ў якасці спагнання змяшчала ў адзіночную камеру, піша «Вясна».
Цяпер палітвязня перавялі ў атрад № 9. Вядома, што ў сакавіку Андрэя закідвалі ў карцар на 39 дзён.
Нагадаем, палітвязня, які падчас прадвыбарчай кампаніі 2020 года быў валанцёрам ініцыятыўнай групы Святланы Ціханоўскай, утрымлівалі 7 месяцаў у межах «справы Ціханоўскага». 26 лістапада 2020 года Новікава дэпартавалі ў Расію, забараніўшы наведваць Беларусь цягам 10 гадоў. Але мужчына ўсё ж такі прыехаў у Беларусь, каб наведаць жонку з дзецьмі.
5 жніўня палітвязня асудзілі да 2 гадоў калоніі за ўдзел у групавых дзеяннях, якія груба парушаюць грамадскі парадак, і незаконнае перасячэнне мяжы.
