Барэль: Пуцін думаў, што ЕС не ўвядзе санкцыі, але ён памыліўся
Кіраўнік еўрапейскай дыпламатыі Жазэп Барэль заявіў, што Еўрасаюз паступова вызваляецца ад залежнасці, якая доўга тармазіла палітычныя рашэнні.
«Да канца 2022 года ЕС скароціць імпарт расійскай нафты на 90%. Мы таксама імкліва скарачаем імпарт газу. Імаверна, Уладзімір Пуцін лічыў, што Еўропа не наважыцца ўвесці санкцыі з-за сваёй энергетычнай залежнасці ад РФ. Гэта адзін з тых значных пралікаў, якія дапусціў расійскі рэжым падчас гэтага канфлікту», — піша Барэль.
Дыпламат прызнаў, што такая хуткая адмова ад расійскіх энерганосьбітаў стварае сур'ёзныя цяжкасці для многіх краін ЕС, а таксама для шэрагу сектараў эканомікі.
«Але гэта цана, якую мы павінны заплаціць за абарону нашай дэмакратыі і міжнароднага права, і мы прымаем неабходныя меры для вырашэння гэтых праблем у духу поўнай салідарнасці», — дадаў дыпламат.
