Знайсці
23.07.2022 / 09:51РусŁacБел

«Жанчына пры грошах» — лёгкая, яркая і кранальная камедыя пра падманутую жонку мільярдэра 

Калі вы шукаеце лёгкі, смешны і пры гэтым не дурны серыял, звярніце ўвагу на гэтую навінку ад Apple TV+. Мая Рудольф добра грае, а сюжэт зацягвае.

Фота: Apple TV+

Верагодна, не кожны зразумее душэўныя мукі настолькі непрыстойна заможнай мільярдэркі, што яна займае трэцяе месца па багацці сярод жанчын у ЗША. Тым не менш, «Жанчына пры грошах» — серыял, які прымусіць вас па-сапраўднаму спачуваць галоўнай гераіне. І ўсё праз туз у рукаве — актрысу Маю Рудольф, якая грае Молі Новак (пазней Уэлс), жанчыну, што хутка стане адной з самых вядомых падманутых жонак у заходнім свеце, піша Guardian.

Молі замужам за тэхнамагнатам Джонам Новакам (Адам Скот, зорка офіснага серыяла «Раздзяленне»), і ўсё яе жыццё напоўнена раскошай і багаццем. Яны жывуць у велізарным асабняку, плаваюць на яхтах з басейнам, а на дні нараджэння Молі выступае поп-зорка мінулага Сіл.

Калі Молі разумее, што яе тэхнамагнат меў сувязь з маладзейшая жанчынай, яна пакідае свой дом (і шлюб) на яркім люксавым аўтамабілі і зарабляе на разводзе 87 мільярдаў даляраў. Далей нарэшце вольная Молі падарожнічае па вечарынах ад Рыа да Пхукета і спрабуе навярстаць там тую шалёную маладосць, якой у яе ніколі не было.

А потым прыходзіць асэнсаванне, і новаспечаная Молі Уэлс пачынае шукаць сэнс новага жыцця. Яна даведваецца, што існуе дабрачынны фонд, заснаваны ад яе імя і на яе грошы. І хаця Молі даўно не працавала, яна вырашае, што зараз самы час вярнуцца ў офіс і пачаць займацца сваім фондам.

З першага погляду «Жанчына пры грошах» выглядае сатырай на звышбагатых. Але аўтары не спыняюцца на гэтым і ператвараюць стужку ў мілую камедыю. Молі — глухая і адарваная ад рэальнасці прадстаўніца эліты, і яе спробы паўдзельнічаць у працы фонду проста жахлівыя. Чаго толькі вартая яе прамова на адкрыцці прытулку для бяздомных — яна прымусіць вас адчуць сапраўдны сорам за экс-жонку тэхнамагната.

І ўсё роўна серыял зроблены з вялікім густам. Сапраўдная кіраўніца фонду Сафія — голас разуму ва ўсёй гэтай сітуацыі і чалавек, які спрабуе ўраўнаважыць дзіўныя ўчынкі Молі. Вам спадабаецца тое, як яна адказвае на доўгі і эмацыйны расповед мільярдэршы пра яе жыццёвыя страты: «Прабачце, мяне гэта не хвалюе». Ідэальная інтанацыя для гутаркі з багачкай.

Без Маі Рудольф гэты серыял не спрацаваў бы, але ж не толькі яна — сакрэт яго эфектыўнасці. Але ж Молі павінна зразумець, што яна — не цэнтр сусвету, і акцёры другога плана ствараюць персанажаў, якія здольныя дапамагчы Молі ў гэтым. У «Жанчыне пры грошах» ёсць свой гумар (згадаем хаця б сцэну, дзе Молі паядае курыныя крыльцы), але ёсць і кранальныя моманты.

Серыял добра расказвае пра сяброўства, у ім нават ёсць намёкі на рамантычную лінію, хаця яна там і не галоўная. У выніку мы маем стужку пра дрэннага (ці вельмі наіўнага) чалавека, які проста жадае стаць лепшым. Усяго гэтага дастаткова для таго, каб пад канец серыяла вы пачалі па-сапраўднаму перажываць за яго герояў.

Рэйтынгі на вялікіх сусветных рэсурсах:

IMDB — 6,3 / 10

Rotten Tomatoes — 81%

Што паглядзець. «Зіхатлівыя» — захапляльны трылер з бездакорнай Элізабет Мос

Што паглядзець. «Лінкальн» для адваката» — больш, чым проста серыял пра суд

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера