Што паглядзець. «Тэгеран» — папулярны шпіёнскі серыял, які вы маглі прапусціць

У маі стрымінгавы сервіс Apple TV+ прадставіў другі сезон хітовага ізраільскага серыяла «Тэгеран». Да драйву, напружанасці і інтрыг, якімі адзначалася першая частка шоу, дададзім удзел у новым сезоне васьмікратнай намінанткі на «Оскар» Глен Клоўз. Што атрымалася ў выніку?

Кадр з серыяла: Apple TV+ via AP

Самалёт, які ляціць з Катара, выпадкова (ці не) садзіцца ў Тэгеране, і з яго сыходзіць дзяўчына. Яе імя — Тамар, і гэта агентка ізраільскага «Масада», якая мае місію абясшкодзіць ядзерны рэактар і спрыяць абясшкоджанню СПА Ірана. Тамар маладая і не надта вопытная, і хутка за ёй пачынае сачыць іранскі спецслужбіст Фараз, які пакінуў хворую жонку, каб злавіць шпіёнку.

Вам можа падацца крыху павольным развіццё падзей у першым сезоне. Пачатак серыяла імклівы, але далей сюжэт ператвараецца ў гульню ў ката і мыш на фоне росту напружанасці паміж «Масадам» і Іранам. Вы не пабачыце ў серыяле дакладнага вырашэння гэтага суперніцтва, але ці не так усё працуе ў рэальным свеце?

Персанажы серыяла, тым не менш, добра прапісаныя, а Тамар — дастаткова цікавая гераіня, каб перажываць за яе на працягу серый. Маладая агентка, як і Фараз, перажывае супрацьстаянне паміж следаваннем за сэрцам і сваёй місіяй.

Прагляд шпіёнскага трылера можа пайсці па двух шляхах. З аднаго боку, сюжэт можа быць напружаным, і вы ўвесь час будзеце кусаць пазногці. Або можна закочваць вочы, крычаць на тэлевізар і здзіўляцца, як героі могуць быць такімі дурнымі.

З «Тэгеранам» цяжка вызначыць, да якой катэгорыі ён належыць. У першым сезоне шоу былі моманты як першага, так і другога тыпаў, у другім сезоне яны захоўваюцца і выглядаюць яшчэ ярчэйшымі. Тут хапае як напружаных эпізодаў, так і момантаў, калі Тамар і яе група паводзяць сябе настолькі неразумна, што дзіўна, што іх не забілі.

У выніку мы атрымліваем захапляльны, прыцягальны, расчаравальны і раздражняльны серыял, які нібыта ідзе па канаце ўвесь час, але пры гэтым кантралюе ўсё гэта і застаецца цікавым і вартым прагляду. Другі сезон серыяла лічаць крокам назад у параўнанні з першым, але і тут ёсць дастаткова фактараў, якія робяць «Тэгеран» цікавым для прагляду.