Абвінавачанне запрасіла для бабруйскіх «тэрарыстаў» вялізныя тэрміны зняволення
У судзе Бабруйскага раёна і Бабруйска працягваецца суд над групай мясцовых «тэрарыстаў». Па справе праходзяць Ігар Казлоў, Канстанцін Ермаловіч, Віталь Мінкевіч, Наталля Кед і Надзея Полькіна. І сёння пракурор запрасіў для іх тэрміны зняволення, паведамляе «Вясна».
Трох мужчын і дзвюх жанчын абвінавачаваюць па некалькіх артыкулах: стварэнне арганізацыі для ажыццяўлення тэрарыстычнай дзейнасці або ўдзел у ёй (ч. 2 арт. 290-4 КК), акт тэрарызму (ч.2 арт. 289 КК), пагроза здзяйснення акта тэрарызму; (ч.2 арт. 290 КК), абраза Лукашэнкі (ч.1 арт. 368 КК).
Сёння абвінавачанне запрасіла для «тэрарыстаў»-мужчын вялізныя тэрміны зняволення. Так, па інфармацыі тэлеграм-канала «Бобруйск Online», для Канстанціна Ермаловіча просяць 17 гадоў пазбаўлення волі, Віталя Манкевіча — 16 гадоў, Ігара Казлова —15 гадоў. Для жанчын тэрміны просяцца нашмат меншыя: для Надзеі Полькінай — 2 гады калоніі, а для Наталлі Кед — 2 гады «хатняй» хіміі.
Абвяшчэнне прысуду адбудзецца заўтра ў 10.00 у судзе па вуліцы Кастрычніцкай, 128. Пасяджэнне будзе адкрытым.
