Знайсці
05.08.2022 / 13:073РусŁacБел

Штучны інтэлект ужо стварае мастацтва. Ці здолее ён замяніць крэатыўны клас?

Нядаўна кампанія OpenAI выпусціла DALL-E 2. Гэта нейрасетка, здольная генераваць яскравыя і рэалістычныя фатаграфіі, карціны і ілюстрацыі ў адказ на тэкставы запыт. У адной з заўваг да рэлізу ёсць папярэджанне, што выкарыстанне прадукту «можа прывесці да выцяснення працоўных месцаў дызайнераў, фатографаў, мадэляў, рэдактараў і мастакоў», піша Wired.

Праўда, пакуль што гэтага не адбылося. Людзі, якія атрымалі ранні доступ да нейрасеткі DALL-E, выявілі, што яна дапамагае творчасці, а не замяняе яе. Бенджамін фон Вонг, мастак, які стварае інсталяцыі і скульптуры, кажа, што DALL-E павысіў яго прадукцыйнасць. «DALL-E з'яўляецца выдатным інструментам для такіх людзей, як я, якія не ўмеюць маляваць», — кажа фон Вонг, які выкарыстоўвае гэты інструмент для вывучэння ідэяў, якія пасля можна ўвасобіць у творы мастацтва. — Замест таго, каб рабіць накіды канцэпцый, я магу проста генераваць іх з дапамогай розных фраз-падказак».

DALL-E — адзін з мноства новых інструментаў штучнага інтэлекту для стварэння малюнкаў. Аза Раскін, мастак і дызайнер, выкарыстаў праграмнае забеспячэнне з адкрытым зыходным кодам для стварэння музычнага відэа для музыканта Зіі Кара, якое было паказана на канферэнцыі TED у красавіку. Гэты праект дапамог пераканаць яго ў тым, што штучны інтэлект, які генерыруе выявы, прывядзе да выбуху творчасці, якая назаўжды зменіць візуальнае асяроддзе чалавецтва.

Пакуль яшчэ рана казаць пра тое, як такая пераўтваральная тэхналогія ў выніку паўплывае на ілюстратараў, фатографаў і іншых творчых работнікаў. Але цяпер ідэя пра тое, што мастацкія інструменты штучнага інтэлекту выцесняць крэатыўны клас, падобная на тое, як людзі часам апісваюць робатаў, якія заменяць рабочых на заводах, і здаецца празмерным спрашчэннем.

Першая версія DALL-E, анансаваная ў студзені 2021 года, стала вяхой для камп'ютарнага мастацтва. Яна паказала, што алгарытмы машыннага навучання, якія выкарыстоўваюць у якасці навучальных даных многія тысячы выяваў, могуць дапаўняць існуючыя выявы новымі формамі.

Рэзультат увядзення ў DALL-E запыту «Карціна Іераніма Босха, намаляваная Пікаса, намаляваным Фра Ангеліка». Фота: fdecomite/flickr.com

Праз год выйшла DALL-E 2, у якой была прыкметна палепшаная якасць выніковых малюнкаў. Яна таксама можа ўпэўнена пераймаць розныя мастацкія стылі і ствараць больш фотарэалістычныя малюнкі. Хочаце атрымаць фатаграфію студыйнай якасці сабакі пароды Сіба-Іну ў берэце і чорным швэдары? Проста ўвядзіце гэта ў пошукавы радок і чакайце.

Многія людзі, якія эксперыментуюць з DALL-E і падобнымі інструментамі штучнага інтэлекту, апісваюць іх не як новы від мастацкага памочніка або музы. «Гэта падобна на размову з іншапланетнай істотай», — кажа Дэвід Мансан, фатограф, пісьменнік і выкладчык англійскай мовы ў Японіі, які выкарыстоўваў DALL-E на працягу апошніх двух тыдняў. — Ён спрабуе зразумець тэкставую падказку і перадаць нам тое, што бачыць, і часта выдае тое, чаго вы зусім не чакаеце».

Новая версія DALL-E — толькі адзін з прыкладаў шэрагу магутных інструментаў генерацыі малюнкаў. Нядаўна Google анансаваў два такіх інструмента — Imagen у маі і Parti ў чэрвені. Некалькі праектаў з адкрытым кодам таксама стварылі генератары малюнкаў, такія як Craiyon, які стаў вірусным у мінулым месяцы пасля таго, як людзі пачалі выкарыстоўваць яго для стварэння мемаў у сацыяльных сетках.

Згенераваная Craiyon выява па запыце «Беларусь пасля атамнай вайны»

З'явіліся новыя кампаніі, якія займаюцца камерцыялізацыяй мастацкіх інструментаў штучнага інтэлекту. Вэб-сайт і дадатак пад назвай Wombo можа генераваць выявы ў розных стылях у адказ на тэкставую падказку або існуючы малюнак, і прадае раздрукоўкі або NFT вынікаў. Midjourney, незалежная даследчая лабараторыя, якая дала сваю тэхналогію бэта-тэстарам, можа ператварыць тэкставыя падказкі ў яркія, часам абстрактныя ілюстрацыі.

Дэвід Хольц, заснавальнік Midjourney, не лічыць, што яго інструмент канкурыруе з мастакамі. «Мы сканцэнтраваныя на вывучэнні сутнасці ўяўлення, — кажа ён. — Уяўленне выкарыстоўваецца для многіх рэчаў, часам для мастацтва, але часцей проста для разважанняў і гульні. Мы б не назвалі тое, што мы ствараем, мастацтвам штучнага інтэлекту, бо ён нічога не стварае сам па сабе. У яго няма ні волі, ні кіравання».

DALL-E і многія іншыя мастацкія інструменты штучнага інтэлекту пабудаваныя на апошніх дасягненнях у галіне машыннага навучання, якія дазволілі алгарытмам, якія апрацоўваюць тэкст ці малюнкі, працаваць са значна большымі маштабам і дакладнасцю. Некалькі гадоў таму даследчыкі знайшлі спосаб падачы велізарных аб'ёмаў тэксту, узятых з раманаў і інтэрнэту, у гэтыя алгарытмы, што дазволіла ім улоўліваць статыстычныя заканамернасці тэксту. Пасля такога навучання сістэма магла генераваць вельмі пераканаўчы тэкст, калі ёй давалі першы сказ.

Магчыма, самым вялікім змяненнем, якое прынясуць генератары малюнкаў са штучным інтэлектам, стане рэзкае пашырэнне кола людзей, здольных ствараць і эксперыментаваць з мастацтвам і ілюстрацыямі. «Аптымістычна можна сказаць, што гэта рэвалюцыя ў камунікацыі», — кажа Том Уайт, мастак з Новай Зеландыі, чые працы прысвечаны штучнаму інтэлекту. Па словах Уайта, нават тыя, хто не схільны да творчасці, могуць выкарыстоўваць такія інструменты для стварэння і абмену крэатыўнымі малюнкамі — людзі ўжо робяць гэта мемамі Craiyon. «Гэта можа змяніць наша стаўленне адзін да аднаго».

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
2
нахАлка толстАя/адказаць/
05.08.2022
вот журналистов точно ИИ заменит. вы сами об этом писали. а может и уже заменил
0
Максим Дизайнер/адказаць/
05.08.2022
Нет, не сдолеет. Машины делают людей машинами. Уже сто лет существуют конструкторы по созданию сайтов, игр, чего хочешь. А хорошего цифрового дизайнера днем с огнем не сыскать.
0
дочка Макса Дизайнера/адказаць/
05.08.2022
Максим Дизайнер, а вы? а вы разве нехороший цифровой дизайнер? 
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера