«Прыйшлі і прыставілі пісталеты да галавы». Як Расія ўсталявала кантроль над інтэрнэтам у Херсонскай вобласці
Праз некалькі тыдняў пасля таго, як Расія на пачатку сакавіка акупавала Херсон, расійскія вайскоўцы прыйшлі ў офісы мясцовых інтэрнэт-кампаній і запатрабавалі адмовіцца ад кантролю над сваімі сеткамі, паведамляе «Бі-бі-сі» са спасылкай на New York Times.
«Яны прыйшлі да іх, прыставілі пісталеты да галавы і проста сказалі: «Выконвайце!». І прарабілі гэта з усімі кампаніямі», — распавёў Максім Смелянец, уладальнік інтэрнэт-правайдара з Кіева, які працаваў у Херсоне.
Паводле звестак украінскага ўрада, некаторыя ўкраінскія інтэрнэт-правайдэры сапсавалі сеткі, каб не перадаваць іх расійскаму боку.
Яшчэ 29 мая Херсон заставаўся падключаным да глабальнага інтэрнэту, але 1 чэрвеня сувязь абарвалася. Расійскія ўлады перанакіравалі херсонскія мабільны і інтэрнэт-трафік праз расійскія сеткі.
Так у Херсоне аказаўся заблакаваны доступ да Фэйсбука, Інстаграма і Твітара, а таксама да ўкраінскіх навінных сайтаў і іншых крыніц незалежнай інфармацыі. Украінскія сотавыя сеткі ў горадзе таксама аказаліся адключаныя, і мясцовыя жыхары былі вымушаныя пачаць карыстацца паслугамі расійскіх мабільных аператараў.
Аналагічная сітуацыя склалася і ў іншых украінскіх рэгіёнах, якія апынуліся пад расійскай акупацыяй. Жыхары гэтых тэрыторый маюць доступ толькі да расійскага дзяржаўнага тэлебачання і радыё, а ў некаторых раёнах інтэрнэт і сотавыя сеткі і зусім адключаныя.
Як паведамілі выданню ўкраінскія інтэрнэт-аператары, на некаторых акупаваных Расіяй тэрыторыях Украіны лічбавая цэнзура яшчэ больш жорсткая, чым у самой Расіі: паводле іх звестак, у Херсонскай і Данецкай абласцях заблакаваныя Google, YouTube і месенджар Viber, якія ў самой Расіі застаюцца даступнымі.
Па звестках украінскіх уладаў, па стане на чэрвень каля 15% украінскай інтэрнэт-інфраструктуры па ўсёй краіне было пашкоджана або знішчана. Прынамсі 11% базавых станцый сотавай сувязі не працуюць праз пашкоджанні або адсутнасць сілкавання.
З-за гэтага некаторыя жыхары акупаваных Расіяй тэрыторый аказаліся адарваныя ад зносін са сваімі блізкімі. Каб дапамагчы людзям у гэтых рэгіёнах падлучыцца да глабальнай сеткі, украінскі ўрад дае бясплатны доступ да некаторых паслуг VPN.
А ў кагосьці ж "вораг - не расея".