«Гэта не толькі наша мара, але і Расіі». Міністр Пархомчык адказаў на пытанне пра выпуск беларускага легкавіка
«Але ўпушчаны час. Увесь свет жыве міжнароднай кааперацыяй», — прызнае міністр прамысловасці Пятро Пархомчык.
Паводле Пархомчыка, Беларусь будзе ствараць свой уласны легкавы аўтамабіль разам з Расіяй, бо ў яе цяпер, як ні дзіўна, тая ж праблема:
«Гэта не толькі наша мара, але і Расійскай Федэрацыі, — сказаў Пархомчык. — Вы ведаеце, што ў РФ быў свой аўтапрам, і ён нядрэнна развіваўся ў нейкі перыяд часу. Але ў апошні час яны захапіліся стварэннем так званых зборачных вытворчасцяў з рознымі вытворцамі свету. Там былі еўрапейцы, карэйцы, японцы. Яны ўсе згарнулі свае вытворчасці.
Знаходзіліся на тэрыторыі Расійскай Федэрацыі гэтыя зборачныя вытворчасці ў межах 10-15 гадоў і не стварылі за гэты перыяд часу неабходнай лакалізацыі асноўных кампанентаў вытворчасці легкавога аўтатранспарту. І Расія, як і мы, цяпер праз пэўны перыяд часу вырашае гэта пытанне.
Гэта значыць што трэба? Патрэбныя свае масты, свая каробка, свой рухавік.
Але ўпушчаны час. Увесь свет жыве міжнароднай кааперацыяй, а нам зараз прыходзіцца ствараць свой аўтамабіль».
