Сахашчык: Супраць Украіны гатовыя выступіць максімум 10-15% беларускіх салдат
Пагадзіцца ваяваць супраць Украіны гатовыя 10-15 працэнтаў ад баяздольнага складу Узброеных сіл Беларусі. Такое меркаванне выказаў у гутарцы з «Беларускім расследавальніцкім цэнтрам» падпалкоўнік запасу ПДВ, прадстаўнік Кабінета Святланы Ціханоўскай па абароне і нацыянальнай бяспецы Валерый Сахашчык.
Напярэдадні намеснік начальніка галоўнага аператыўнага ўпраўлення Генштаба Узброеных сіл Украіны Аляксей Громаў паведаміў, што да 13 тысяч асоб з ліку дзейных і былых вайскоўцаў падраздзяленняў беларускіх сіл спецыяльных аперацый, а таксама АМАПа падпісалі згоду на ўдзел у вайне супраць Украіны.
Валерый Сахашчык сказаў, што не валодае дакладнай інфармацыяй на гэты конт, але не верыць, што так шмат беларускіх вайскоўцаў маглі пагадзіцца ваяваць супраць Украіны. На яго думку, гэта можа быць каля 10-15% ад баяздольнага складу Узброеных Сіл Беларусі.
«Не так шмат адмарозкаў, якія гатовыя ісці забіваць і гінуць самі. Мне называлі лічбу максімум у дзесяць адсоткаў», — сказаў ён.
Паводле звестак Міжнароднага інстытута стратэгічных даследаванняў, у 2020 годзе ў Беларусі налічвалася блізу 45 тысяч вайскоўцаў. Гэта значыць, гаворка можа ісці пра 4-5 тысяч беларускіх вайскоўцаў, гатовых ваяваць супраць Украіны. Сахашчык удакладніў, што дакладных сацыялагічных даных ніхто не мае. Акрамя таго, многае залежыць ад таго, як сфармуляваць пытанне.
«Калі цябе паставяць перад выбарам — садзішся ў турму або выканаеш загад і пойдзеш ва Украіну, тады будзе не дзесяць, а шэсцьдзесят або дзевяноста адсоткаў. І далей чалавек ужо будзе думаць, што яму рабіць пасля перасячэння мяжы. Калі б нас дапусцілі правесці апытанне ў батальённа-тактычных групах, якія сядзяць ля мяжы, то можна было б пра нешта казаць. Цяпер мы з вамі проста гадаем на кававай гушчы», — падкрэсліў прадстаўнік Кабінета Святланы Ціханоўскай.
