Гіркін абвяргае звесткі пра спробу патрапіць на фронт і затрыманне ў Крыме
Былы «міністр абароны» псеўдарэспублікі «ДНР» Ігар Гіркін (Стралкоў) абвяргае паведамленні аб сваім затрыманні ў Крыме.
«У КПЗ не быў і не планую», — напісаў ён у сацыяльных сетках.
Паводле звестак шэрагу каналаў, ён паспрабаваў трапіць у зону баявых дзеянняў. Па словах Гіркіна, на фронце ён «рана ці позна абавязкова» пабывае, «але не проста цяпер».
У прыватнасці, некаторыя тэлеграм-каналы паведамлялі, што Гіркін спрабаваў трапіць у Херсонскую вобласць па несапраўдным пашпарце на імя Сяргея Рунова, але яго затрымалі і адправілі ў камеру папярэдняга зняволення ў Сімферопалі.
Ігар Стралкоў (Гіркін) — грамадзянін Расіі, афіцэр расійскіх спецслужб, які, як ён сам прызнае, развязаў вайну на ўкраінскім Данбасе.
Гіркін ваяваў у Босніі, Прыднястроўі, Чачні, Украіне.
