Дзве берасцейкі пабіліся з-за ўкусу сабакі ў гарадскім парку
У пачатку мая ў Брэсце ў адным з паркаў адбыўся інцыдэнт: дзве жанчыны пабіліся з-за ўкусу сабакі. Суд аштрафаваў адну з іх, але яна абскардзіла пастанову. Канчатковае рашэнне прыняў Брэсцкі абласны суд.
У пастанове суда імёны берасцеек на называюцца, толькі П. і А.
7 мая ў парку сабака ўкусіў П. за правую нагу. А. падышла да П., каб паглядзець на стан яе нагі. Паміж жанчынамі пачаўся канфлікт. П. штурхнула А., а А. у адказ ўдарыла П. нагой па правым сцягне — туды ж, куды прыйшоўся і ўкус. Гэта пацвердзілі і сведкі. А. сцвярджала, што нанесла ўдар машынальна ў адказ на ўдар П.
Экспертыза, якая была праведзеная праз тыдзень, зафіксавала ў П. пашкоджанні, якія «не пацягнулі за сабой кароткачасовага разладу здароўя або нязначнай стойкай страты працаздольнасці». Было ўстаноўлена, што пашкоджанні ўтварыліся ад удару, нанесенага А.
У выніку А. прызначылі штраф у дзесяць базавых велічынь (320 рублёў).
А. спрабавала абскардзіць рашэнне суда, бо адно з пашкоджанняў было ўкусам сабакі, але эксперт не змог высветліць, якое менавіта, а ўладальніка сабакі таксама аштрафавалі за нанясенне пашкоджанняў П. Аднак суд палічыў, што падставаў для перагляду рашэння не маецца.
