Прэзідэнт Інданезіі заявіў аб планах Пуціна прыехаць на саміт G20. Туды збіраецца і Зяленскі
Прэзідэнт Інданезіі Джока Відода паведаміў, што прэзідэнт Расіі Уладзімір Пуцін збіраецца асабіста прыняць удзел у саміце краін «Вялікай дваццаткі», які павінен прайсці 15 і 16 лістапада на інданезійскім востраве Балі, паведамляе «Голас Амерыкі».
Як распавёў у інтэрв'ю Bloomberg Джока Відода, Пуцін асабіста паведаміў яму аб жаданні прыехаць на саміт. На Балі, па словах прэзідэнта Інданезіі, таксама збіраецца прыехаць і старшыня КНР Сі Цзіньпін.
Як адзначае Bloomberg, калі візіт Пуціна адбудзецца, то саміт G20 стане першым пасля пачатку вайны ва Украіне мерапрыемствам з удзелам лідараў заходніх краін, на якім будзе прысутнічаць прэзідэнт РФ.
Урадавая крыніца, якая пажадала захаваць ананімнасць, пацвердзіла Bloomberg, што Пуцін збіраецца прыехаць на Балі. Прэс-служба Крамля ад каментарыяў з гэтай нагоды ўстрымалася.
Раней дарадца кіраўніка Офіса прэзідэнта Украіны Міхаіл Падаляк у інтэрв'ю ВВС заяўляў, што Уладзімір Зяленскі можа наведаць саміт G20.