На «судах» у «ДНР» анансуецца прысутнасць назіральнікаў з Беларусі
У самаабвешчанай «ДНР» абяцаюць прысутнасць назіральнікаў з Беларусі, Сірыі і Расеі на «судзе» над замежнымі добраахвотнікамі, якія ваявалі на баку Украіны. Пра гэта ў эфіры тэлеканала «Расія 1» заявіў кіраўнік гэтага ўтварэння Дзяніс Пушылін.
Дзяніс Пушылін
Калі верыць Пушыліну, беларускі рэжым пацвердзіў гатоўнасць даслаць сваіх назіральнікаў, хоць афіцыйна сепаратысцкія ўтварэнні на тэрыторыі Украіны пакуль і не прызнаў.
Пушылін адзначыў, што першае пасяджэнне «суда» над групай вайскоўцаў з замежным грамадзянствам у «ДНР» адбылося 15 жніўня. Судзілі пяць чалавек — грамадзян Харватыі, Швейцарыі, Вялікабрытаніі.
Не выключана, што гэтых людзей расстраляюць як наёмнікаў, хоць усе замежныя грамадзяне і асобы без грамадзянства, якія ўдзельнічаюць у вайне на баку Украіны, афіцыйна прынятыя на вайсковую службу і павінны паводле міжнароднага права мець правы ваеннапалонных. Але міжнароднае права не мае ніякага значэння нават для прызнаных дзяржаў, як Расія і Беларусь, не кажучы пра самаабвешчаныя ўтварэнні.
