РФ выдаткуе 100 млрд расійскіх рублёў на развіццё квантавых тэхналогій
Віцэ-прэм'ер РФ Дзмітрый Чарнышэнка заявіў, што да 2025 года будзе выдзелена не менш за 100 мільярдаў расійскіх рублёў (каля 4,2 млрд беларускіх) на падтрымку навуковых інстытутаў і дзяржкампаній, якія займаюцца развіццём квантавых тэхналогій.
Па словах акадэміка Генадзя Краснікава, квантавыя тэхналогіі закліканыя забяспечыць Расіі тэхналагічную незалежнасць і лідарства.
«Дасягнуўшы перавагі ў гэтым кірунку, мы зможам вывесці многія сферы эканомікі на якасна новы ўзровень. Гэта тычыцца медыцыны, бяспекі, лагістыкі і многіх іншых галін. Мы зможам праводзіць паўнавартаснае мадэляванне адвольных квантавых сістэм, у нас з'явяцца новыя магчымасці па стварэнні матэрыялаў, мадэлявання шырокага кола біялагічных, сацыяльных і эканамічных працэсаў», — сказаў Краснікаў.
