Кіраўніца МУС Германіі заклікала адхіліць Беларусь ад кваліфікацыі да футбольнага Еўра-2024
Нэнсі Фэзер напісала ліст кіраўніку УЕФА Аляксандру Чэферыну з просьбай аб адхіленні не толькі расійскай зборнай, а таксама і беларускай.
Нэнсі Фэзер.
Выданне Der Spiegel прыводзіць некаторыя цытаты з ліста:
«Не толькі Расія, якая вядзе агрэсіўную вайну, якая парушае міжнароднае права, але і Беларусь як ключавы прыхільнік расійскага кіраўніцтва павінна быць адхілена ад усіх міжнародных футбольных гульняў і турніраў».
Фезэр таксама лічыць, што расійскія і беларускія чыноўнікі павінны быць выключаныя з кіруючых органаў міжнародных спартовых арганізацый.
У твітары Фэзер дадала, што футбол павінен заняць адзіную пазіцыю супраць парушэння правоў чалавека і незаконнага нападу на Украіну.
Der Fußball muss geschlossen Haltung gegen die Missachtung von Menschenrechten und den völkerrechtswidrigen Angriff auf die Ukraine zeigen. Deshalb fordere ich die @uefa auf, neben dem russischen auch das belarussische Nationalteam von der #EURO2024-Qualifikation auszuschließen. https://t.co/U2fDV4bVxn
Нагадаем, што пасля расійскага ўварвання ва Украіну расійскую футбольную зборную і клубы выключылі з усіх міжнародных спаборніцтваў. Беларускім дазволілі гуляць толькі на нейтральным полі і без заўзятараў.