Знайсці
24.09.2022 / 15:04РусŁacБел

Італьянскі футбольны клуб размяшчае фота зніклых дзяцей падчас прэзентацыі футбалістаў. Гэта дае плён

Прэзентацыя навічкоў і формы — важны элемент медыйнасці сучаснага футбольнага клуба. Ён дазваляе як пашыраць кола заўзятараў, так і дасягаць камерцыйных поспехаў. Італьянская «Рома» пайшла крыху іншым шляхам.

З 2019 года клуб разам з фота новых футбалістаў размяшчае інфармацыю пра зніклых без вестак па ўсім свеце дзяцей. Акцыя працягваецца дагэтуль і дае рэальныя вынікі, становячыся ўсё больш маштабнай, піша Sports.

Упершыню такія звесткі былі размешчаныя ў прэзентацыі Леанарда Спінаццолы. Побач з фота навічка размяшчалася фатаграфія 5-гадовай малой Элены Рампоні.

Запушчаная «Ромай» кампанія вельмі хутка дала першыя вынікі. Чацвёра зніклых дзяцей былі паспяхова знойдзеныя ўжо праз паўтара месяца пасля запуску. Дзіця з Грэцыі было знойдзенае дзякуючы таму, што яго пазналі па фота з прэзентацыі Стэфана Эль-Шаараві.

«Усё добра, дзіця знойдзенае», — напісала «Рома» ў твітары.

Клуб выкарыстоўвае таргетаванне відэа з прэзентацыямі: так, у роліку пра англічаніна Крыса Смолінга, які прыйшоў з «Манчэстэр Юнайтэд», і набытага ў лонданаскага «Чэлсі» Давідэ Дзапакоксты размяшчаліся фота зніклых дзяцей менавіта з Брытаніі. У абодвух выпадках яны былі знойдзеныя.

Пасля таго, як дзеці знаходзяцца, іх фота знікае — чаму?

Сучаснасць дыктуе вельмі жорсткія ўмовы да ўсяго, што звязана з асабістымі звесткамі ў інтэрнэце, асабліва калі гаворка ідзе пра непаўналетніх.

Як толькі дзіця знойдзенае, набывае моц так званае «права на забыццё», якое патрабуе выдалення з сеціва ўсіх асабістых даных удзельнікаў гісторыі.

Гэта робіцца яшчэ і для прадухілення цкавання людзей.

На жаль, не ўсіх дзяцей атрымоўваецца знайсці.

Пры ўсіх поспехах кампаніі наіўна было б меркаваць, што яна дае 100-працэнтны вынік. Так, 10-гадовы Браян Карыюкі, якога шукалі ў Кеніі, быў знойдзены мёртвым.

«Мы неверагодна засмучаныя», — напісала тады «Рома».

Іншы кейс — 15-гадовы Лі Баксел прапаў у 15-гадовым узросце 31 год таму. Яго фота з'явілася нароўні з астатнімі ў прэзентацыі цэлага шэрагу новых гульцоў «Ромы» ў 2019 годзе.

Бацька хлопчыка ўжо змірыўся з тым, што яго сын не вернецца. Тым не менш ён лічыць, што акцыі, падобныя да той, што праводзіць «Рома», вельмі важныя: «Цяжка апісаць, але гэта прымушае адчуваць сябе не такімі самотнымі. Спадзяюся, што калі ўжо не мой сын, дык іншыя дзеці вернуцца дадому».

У канцы лета-2022 склад «Ромы» папоўніў чарговы навічок: зорны экс-форвард «Тарына», чэмпіён Еўропы Андрэа Белоці. Вядома, ягоную прэзентацыю суправаджалі фота дзяцей і тэлефоны для тых, хто нешта ведае пра іх месцазнаходжанне.

Цяпер клуб супрацоўнічае са шматлікімі дабрачыннымі арганізацыямі па пошуку зніклых без вестак па ўсім свеце. Дзеці з Вялікабрытаніі, Італіі, Грэцыі, Бельгіі, Кеніі і Польшчы былі знойдзеныя пасля з'яўлення ў клубных сацсетках ролікаў, якія анансавалі трансферы.

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера