Латвія ўвяла рэжым надзвычайнай сітуацыі на мяжы з Расіяй
Улады Латвіі абвясцілі аб увядзенні рэжыму надзвычайнай сітуацыі з 28 верасня ў памежных з Расіяй рэгіёнах краіны. Адпаведнае рашэнне было апублікаванае на сайце ўрада краіны.
Рэжым НС будзе дзейнічаць тры месяцы ў Алуксненскім, Балвскім і Лудзенскім раёнах краіны. Ён распаўсюджваецца на аэрапорты і марскія і чыгуначныя пункты перасячэння мяжы.
«На гэты момант сітуацыя на латвійска-расійскай мяжы стабільная, спакойная і знаходзіцца пад строгім кантролем. Аднак з-за абвешчанай у Расіі мабілізацыі колькасць грамадзян РФ, якія жадаюць пакінуць сваю краіну, значна павялічылася. Такім чынам, існуе рызыка хуткага росту колькасці нелегальных мігрантаў і на латвійска-расійскай мяжы», — паведамілі ва ўрадзе Латвіі.
Па даных памежнай службы, колькасць расіян, якія жадаюць уехаць у Латвію, працягвае змяншацца. З 19 па 27 верасня ва ўездзе было адмоўлена 57 грамадзянам РФ.
