МЗС Арменіі выклікала пасла Беларусі з-за выказванняў Макея пра візіт Пэлосі ў Ерэван
У МЗС Арменіі выклікалі незадавальненне словы міністра замежных спраў Беларусі Уладзіміра Макея пра тое, што такія візіты, як візіт Пэлосі, прыводзяць да абвастрэння канфліктаў. Пасла Беларусі ў Арменіі Аляксандра Канюка выклікалі ў МЗС, паведамляе сайт МЗС гэтай краіны.
Надзвычайны і Паўнамоцны Пасол Рэспублікі Беларусь у Рэспубліцы Арменія Аляксандр Канюк. Фота: armenia.mfa.gov.by
«Кіраўнік дыпламатычнай місіі Беларусі ў Арменіі быў запрошаны ў МЗС РА, дзе яму былі перададзеныя заклапочанасць і меркаванні армянскага боку з нагоды заявы», — гаворыцца ў паведамленні.
Спікер Палаты прадстаўнікоў ЗША Нэнсі Пэлосі 17 верасня прыляцела ў Арменію. Да гэтага краіну не наведвалі амерыканскія чыноўнікі такога высокага рангу.
«Падобнага кшталту візіты будуць звязаныя не з прымірэннем тых ці іншых канфліктаў, гэта маё глыбокае перакананне, а, наадварот, з абвастрэннем», — пракаментаваў візіт Пэлосі міністр замежных спраў Беларусі Уладзімір Макей.
