На Данбасе ўкраінскія войскі падышлі да Крамянной, пад Крывым Рогам прабіваюцца да Берыслава
Расійскія франтавыя блогеры характарызуюць сітуацыю ў раёне Залатой Балкі як крытычную для расіян.
Мапа фронту між Ліманам, Крамянной і Сватавам паводле «Рыбаря» па стане на 2 кастрычніка
«Херсонская вобласць. Паўночны ўсход. Напрамак н. п. Шаўчэнкаўка — Залатая Балка. Сітуацыя крытычная», — скупа паведамляе расійскі франтавы тэлеграм-канал «Два майора».
«На Берыслаўскім напрамку праціўнік працягвае прасоўванне, укліньваючыся ў наша размяшчэнне. Перадавыя падраздзяленні праціўніка праніклі да ўскраін сяла Бяляеўка. Сяло Шаўчэнкаўка — пад кантролем УСУ. Глыбіня прарыву праціўніка перасягнула 7 кіламетраў ад зыходнай пазіцыі», — піша інфармаваны Ігар Гіркін (Стралкоў).
Удар украінскіх вайскоўцаў на Херсонска-Крыварожскім кірунку ў нядзелю пасля абеду быў нечаканы. Украінцы кінулі вялікія сілы бранятэхнікі на прарыў фронту на правым беразе Дняпра. Адначасова атакі для адцягвання ўвагі былі нанесеныя ў раёне Давыдавага Броду і Белай Крыніцы ў цэнтры і Праўдзіна на поўдні.
Крытычным некаторыя расійскія блогеры называюць і становішча ў раёне Крамянной на Данбасе. Пакуль ішла зачыстка вызваленага Лімана, перадавыя ўкраінскія войскі замацаваліся ў Торскім, Цёрнах і занялі ваколіцы Крамянной — горада, размешчанага за 35 кіламетраў на ўсход ад Лімана. Расійскія войскі спрабуюць выстраіць лінію абароны па лініі Крамянная—Сватава, але, мяркуючы па тоне расійскіх блогераў, яны не надта разлічваюць на поспех.
«Зараз праціўнік хутчэй за ўсё засяродзіць свае намаганні на пераразанні камунікацый па трасе з Крамянной у Сватава з далейшым прасоўванне на поўнач. ДРГ праціўніка ўжо выходзяць на гэту дарогу», — піша расійскі прапагандыст WarGonzo.
«Паўстае пытанне аб утрыманні Крамянной — аднаго з ключавых пунктаў, якія забяспечваюць паўночны фланг абароны Лісічанска. Крамянную здаваць нельга ні ў якім разе», — заклікае палкоўнік Гіркін.
Крамянная — горад, у якім да вайны жыло 18 тысяч чалавек. Ëн стаіць на левым беразе Северскага Данца адразу над далінай ракі. Ад яго 30 км да Лісічанска. Крамянную расіяне занялі 18 красавіка.
Нагадаем, што 1 кастрычніка расійскае Мінабароны прызнала страту Лімана. «У сувязі са стварэннем пагрозы акружэння саюзныя войскі былі адведзеныя з населенага пункта Чырвоны Ліман на больш выгадныя рубяжы», — гаворыцца ў заяве Масквы.
29 верасня ўкраінскія войскі ўзялі Ямпаль і Стаўкі, тым самым практычна замкнуўшы кола акружэння вакол Лімана.
Ліман — горад на поўнач ад левага берага Северскага Данца. Да вайны ў ім жыло каля 22 тысяч чалавек. Расійскія войскі занялі яго 29 мая, пасля баёў.
Паўночней украінцы стварылі шматлікія плацдармы на левым беразе ракі Аскол і наступаюць ад Лазавой, Купянска ды Двурэчнай у кірунку Баравой і Сватава.
Сватава — райцэнтр на поўначы Луганскай вобласці, да вайны ў ім жыло 16 тысяч чалавек. Расійскія войскі акупавалі горад 6 сакавіка, на 11-ы дзень вайны.
Вызваленне Сватава мела б як стратэгічныя, так і маральныя наступствы. Гэта быў бы першы вызвалены райцэнтр Луганскай вобласці, якая на сёння амаль цалкам кантралюецца расійскімі войскамі.
У выніку імклівага наступу 5—10 верасня ўкраінская армія вызваліла Балаклею, Купянск, Ізюм і Ваўчанск, а расійскія злучэнні хаатычна адступілі на левыя берагі рэк Северскі Данец і Аскол. У выніку расіянам не ўдалося стварыць надзейнай лініі абароны па гэтых рэках, як яны спадзяваліся, але і ўкраінская армія не заняла з налёту Ліман і Сватава. Баі за Ліман доўжыліся тры тыдні, але разам з яго акружэннем расійская абарона рассыпалася і ўкраінцы прасунуліся на 30 км на поўнач і 30 км на ўсход, вызваліўшы пад тысячу квадратных кіламетраў.
Баі рознай інтэнсіўнасці на подступах да гэтых гарадоў працягваюцца ўжо амаль два тыдні.
Адначасова расійскія блогеры і камандзір Аляксандр Хадакоўскі паведамілі, што расійскія войскі пакінулі раней захопленыя пазіцыі ў Мар'інцы і Пясках пад Данецкам.
У той жа час пад Херсонам і Запарожжам працягваюцца пазіцыйныя баі, лінія фронту не мяняецца.
Выглядае, што рэзервы расійскага камандавання вычарпаліся, і спадзявацца Расіі застаецца толькі на новых мабілізаваных. Але і Украіна пакуль не мае дастаткова рэзерваў і авіяцыі, каб ствараць вялікія катлы, і абмяжоўваецца павольным прасоўваннем.
Чытайце таксама:
Міністр абароны ЗША: Мы ўсе павінны быць натхнёныя тым, што бачым
«Тэхнікі і людзей у хахлоў проста процьма». Украінскія войскі нечакана атакавалі на Крыварожскім і Херсонскім участках
«На больш выгадныя рубяжы». Стала вядомая афіцыйная фармулёўка Мінабароны Расіі пра здачу Лімана
Зяленскі: Украінскія войскі цалкам зачысцілі Ліман на Данеччыне
