Загінуў 22-гадовы прапагандыст БТ Андрэй Семчанка. Кім ён быў і што расказваў з экранаў?

Фота: сацыяльныя сеткі

Андрэй Семчанка нарадзіўся ў Гомелі. У 2021-м ён скончыў журфак БДУ па спецыяльнасці «Журналістыка міжнародная». 

Ва ўніверсітэце ён быў старастам групы, а таксама нейкі час займаў пасаду старшыні «Творчага саюза». 

Пасля выпуску з універсітэта хлопец пайшоў працаваць на БТ, магчыма, па размеркаванні.

У сваіх сюжэтах Андрэй Семчанка расказваў аб праблемах у краінах Захаду. Так, ён сцвярджаў, што Еўропа больш не можа сябе пракарміць і яе чакае голад і галеча. Насамрэч, узровень жыцця ў еўрапейскіх краінах вышэйшы, часам на парадак, чым у Беларусі.

«Ціхая раздражнёнасць уладаў тлумачыцца вельмі проста. У супермаркетах з паліц пачалі знікаць прадукты. Парушэнні лагістычных паставак і байкот урадавых мер б'юць, вядома, па звычайных грамадзянах», — запэўніваў ён у адным з сюжэтаў. 

Перыядычна Андрэй Семчанка браў каментары ў расійскіх і кітайскіх псеўдаэкспертаў, у якіх рознымі спосабамі дэманізаваліся дэмакратычныя краіны.

«Дзесяцігоддзі бязлітасных войн, сотні тысяч ахвяр, бамбардзіроўкі і разбурэнне эканомік, — казаў ён. — Для некаторых краін вайна — гэта трагедыя, але для Штатаў — гэта, хутчэй, лад жыцця».

Яшчэ Семчанка браў каментары ў персанажаў, якіх называў «замежнымі экспертамі». 

Так, напрыклад, у яго сюжэце быў упаўнаважаны па міжнародных справах партыі «Нямецкі цэнтр» Олівер.

«Ён вырашыў праверыць на трываласць легенду заходняй прапаганды аб Беларусі, прыехаў у нашу краіну і быў прыемна здзіўлены, — такое апісанне сюжэта з Оліверам. — Чыстыя вуліцы, прыязны народ, вялізны патэнцыял узаемадзеяння і інфармацыйная дзірка ў нямецкай інфапрасторы.

Куды больш Олівер здзівіўся, калі пачаў даведвацца пра злачынствы фашысцкага рэжыму на тэрыторыі Беларусі ў часы Другой сусветнай вайны. Калі ён захацеў падзяліцца гэтай інфармацыяй праз нібы свабодную Вікіпедыю, быў забанены і выдалены. І чым большай агалосцы гісторыя аддавалася, тым больш над Оліверам згушчаліся хмары незадаволенасці палітыкаў».

Насамрэч, Вікіпедыю запаўняюць сотні тысяч людзей, а баняць толькі тых, хто змяшчае заведамую хлусню ці парушае тыя ці іншыя правілы. 

Вікіпедыя — свабодная недзяржаўная энцыклапедыя, аднак у ёй ёсць пэўныя правілы працы з данымі. Адзінкавы выпадак цэнзуры з боку адміністратара ў Вікіпедыі нельга выдаць за сістэматычнае ўтойванне гістарычнай праўды ў Германіі.

«Узімку брытанцам давядзецца рабіць выбар: галадаць ці змерзнуць, — казаў Семчанка ў іншым сюжэце.

— Сюды дадаць малаэфектыўныя антырасейскія санкцыі, максімальную за 50 гадоў інфляцыю (ужо большая за 10%), даражэюць як прадукты, так і камуналка з энерганосьбітамі. Песімісты жартуюць, што зімой брытанцы будуць рабіць выбар: галадаць ці змерзнуць. Несалодка даводзіцца малому і сярэдняму бізнэсу».

Па інфармацыі выдання «Позірк», Семчанка загінуў у выніку няшчаснага выпадку: ён прымаў ванну і яго стукнула токам з-за кароткага замыкання — працавала пральная машына.

Чытайце таксама: 

З журфака БДУ сышла дэкан — яна адлічвала студэнтаў пасля сутак

Шпакоўскі пераабуўся, смярдзючая Еўропа і Лукашэнка — гэта новы Вітаўт. Што там прапаганда нагаварыла за апошнія дні? 

Nashaniva.com

Хочаш падзяліцца важнай інфармацыяй
ананімна і канфідэнцыйна? Пішыце рэдактару
«Нашай Нівы» ў ТГ