Затрымалі жонку палітвязня Арцёма Анішчука
Як стала вядома праваабаронцам, у Мінску сёння затрымалі жонку палітвязня Арцёма Анішчука Вольгу. Прычыны і падрабязнасці пакуль невядомыя, піша «Вясна».
28 снежня мінулага года Вольгу Анішчук ужо затрымлівалі супрацоўнікі ГУБАЗіКа. Перад гэтым дома ў Анішчукоў правялі ператрус.
Нагадаем, Арцёма Анішчука асудзілі 3 лютага 2021 года да двух гадоў калоніі за пашкоджанне машыны супрацоўніка Дэпартамента выканання пакаранняў Аляксандра Гейца. Яго адправілі адбываць тэрмін у магілёўскую калонію №15, дзе ён зазнаў катаванні і збіццё. Там супраць яго заводзілі крымінальную справу па арт. 411 КК (злоснае непадпарадкаванне патрабаванням адміністрацыі папраўчай установы), на яго аказваўся ціск.
Арцём мусіў выйсці на свабоду напрыканцы чэрвеня, адбыўшы цалкам тэрмін у два гады, але яго зноў затрымалі і асудзілі па новай крымінальнай справе па арт. 369 КК за абразу міліцыянта ў закрытым тэлеграм-чаце — да яго затрымання. Арцёму засталося адбываць яшчэ каля года зняволення. Ён знаходзіцца ў бабруйскай калоніі.
