Рэцэпт на выхадныя. Маркоўны хлеб — смачная і простая выпечка

Гэтая выпечка можа стаць добрым дэсертам. А маркоўны пірог з арэхамі пад апельсінавай глазурай можа нават запомніцца.

Фота: BBC Food

Каб зрабіць маркоўны хлеб, вам спатрэбіцца:

140 мілілітраў алею + яшчэ трохі для змазвання
2 яйкі
200 грамаў цукру (лепш браць карычневы)
300 грамаў цёртай морквы
100 грамаў разынак
75 грамаў пасечаных грэцкіх арэхаў ці арэхаў пекан (па жаданні)
180 грамаў мукі
дробка солі
палова чайнай лыжкі соды
1 чайная лыжка молатай карыцы
палова чайнай лыжкі цёртага мускатнага арэху
палова чайнай лыжкі любой сумесі спецый для выпечкі
200 грамаў халоднага сметанковага сыру тыпу маскарпонэ з не менш чым 33% тлушчу
50 грамаў масла хатняй тэмпературы
1 чайная лыжка ванільнага экстракту
50 грамаў прасеянай цукровай пудры
цэдра аднаго апельсіна

Разагрэйце духоўку да 150 градусаў. Падрыхтуйце форму для хлеба — яе памер мусіць быць прыкладна 13 на 23 сантыметры. Змажце яе алеем і высцеліце паперай для выпякання.
Узбіце яйкі ў вялікай місцы. Дадайце алей, цукар, цёртую моркву, разынкі і арэхі.
Прасейце ў яйкавую сумесь муку, соль, соду, карыцу, мускатны арэх і спецыі. Добра ўсё перамяшайце драўлянай ці вялікай металічнай лыжкай.
Выліце сумесь у форму для хлеба і разраўняйце паверхню. Выпякайце маркоўны хлеб прыкладна 1 гадзіну 15 хвілін ці пакуль шпажка, якую для праверкі можна ўваткнуць у сярэдзіну пірага, не будзе выходзіць адтуль чыстай.
Дастаньце пірог з духоўкі і дайце яму астыць прыкладна 5 хвілін, потым дастаньце з формы. Перад падачай цалкам астудзіце маркоўны хлеб.
Каб зрабіць глазуру, узбівайце разам у місцы маскарпонэ і масла, пакуль яны добра не перамяшаюцца. Дадайце ванільны экстракт, цукровую пудру і апельсінавую цэдру, перамешвайце ўсё, пакуль глазура не загусцее. З дапамогай шпаталя раўнамерна размяркуйце глазуру па астуджаным пірагу, калі глазура будзе цяжка размазвацца, акуніце нож у міску з гарачай вадой. Перад падачай нарэжце пірог на лусты. Маркоўны хлеб, калі ён не нарэзаны, можна захоўваць некалькі дзён, таксама смела замарожвайце яго. Замарожаны ён можа ляжаць да трох месяцаў.