Знайсці
13.11.2022 / 14:10РусŁacБел

«Завялі справу за металалом». Разбіраемся, які лом можна здаваць, а за які можа прыляцець

Міліцыя перыядычна паведамляе пра затрыманне людзей, якія везлі металалом у нарыхтоўчую кантору. Абвінавачваюць у незаконнай прадпрымальніцкай дзейнасці. Расказваем, што здаваць можна, а што — не.

Ілюстрацыйны здымак. Фота: kurjer.info

Заканадаўства не забараняе здаваць бытавы лом, але…

Людзям не забаронена здаваць нарыхтоўчым арганізацыям бытавы лом — гэта той, які ўтварыўся ў выніку гаспадарчай дзейнасці. Яго дазваляецца прывозіць з уласнага двара ў любым аб’ёме.

Нарыхтоўчыя канторы не ўсё прымаюць. Спіс дазволенага вызначае палажэнне «Аб парадку закупкі лому і адходаў чорных і каляровых металаў у насельніцтва». У ім прадметы хатняга ўжытку і бытавой тэхнікі. Акрамя таго, нарыхтоўцы забяруць легкавыя і грузавыя аўтамабілі, прычэпы, сельскагаспадарчую тэхніку, чаўны і іншыя рэчы, пазначыўшы іх даныя ды пашпартныя звесткі ўладальніка.

Калі «ўласнага металалому» зашмат, то могуць з'явіцца пытанні ў органаў, таму варта быць гатовым давесці адкуль ён.

«У тым і прыкол, што трэба даказаць, што гэты метал з твайго дома, агарода, гаража, — апавядае адзін з пакараных. — У мяне такая сітуацыя была. Ехаў здаваць. Спыніла ДАІ. На штрафстаянку прычэп. Праз месяц быў суд, які аштрафаваў мяне на 31 рубель, і 700 кілаграмаў металу канфіскавалі. Гэта справа выпадку».

Дзе нельга збіраць металалом, і што стварае пагрозы

Збіранне фізічнай асобай металалому на звалках, у закінутых прамысловых будынках для здачы нарыхтоўчым арганізацыям лічыцца незаконнай прадпрымальніцкай дзейнасцю. Іншымі словамі, калі чалавек прыцягне каналізацыйны люк, часткі прамысловага агрэгата, вялікі маток дроту, то яго самога «здадуць». 

У нарыхтоўчай канторы рэгіструецца факт здачы металалому. Калі другасную сыравіну здае адзін чалавек неаднаразова, то гэта можа быць расцэнена як прадпрымальніцкая дзейнасць. Калі на яе няма дазволу, то чакайце праблемаў.

Згодна з заканадаўствам, грамадзяне мэтанакіравана нарыхтоўваць і скупляць металалом не могуць. Такая дзейнасць лічыцца незаконнай і караецца штрафам да 100 базавых велічыняў (3200 рублёў) з канфіскацыяй металалому (частка 1-1 арт. 12.7 КоАП).

Калі даход ад рэалізацыі канфіскаванага металалому перавысіць 1000 базавых велічынь (па стане на сёння 32 000 рублёў), караць будуць ужо паводле арт. 233 Крымінальнага кодэкса, які прадугледжвае да сямі гадоў пазбаўлення волі.

Каму можна збіраць і скупляць металалом

У міліцэйскіх зводках гісторый з пакараннямі за незаконнае абарачэнне металалому нямала. Герой адной з апошніх, 28-гадовы жыхар Магілёва, за паўгода назбіраў больш за 8 тон лому. Збыць яго хацеў у нарыхтоўчую кантору, але хованку на лецішчы выкрылі аператыўнікі. Мужчына трапіў пад адміністрацыйны пераслед, а металалом на суму 2400 рублёў канфіскавалі.

Як патлумачыў «Нашай Ніве» юрыст, на збіранне або закуп прамысловага лому, адкідаў чорных і каляровых металаў трэба мець ліцэнзію. Яе выдае Міністэрства прамысловасці згодна з указам Лукашэнкі «Аб ліцэнзаванні асобных відаў дзейнасці«.

«У Беларусі права на законных падставах ажыццяўляць такую дзейнасць маюць прадпрыемствы «Белдрагмета», нарыхтоўчыя арганізацыі «Белкаапсаюза» і індывідуальныя прадпрымальнікі, калі ў іх ёсць адпаведная ліцэнзія», — даводзіць эксперт.

На абвестачных інтэрнэт-сервісах паведамленняў з гатоўнасцю купіць металалом безліч. За кожнай з прапаноў стаіць прадпрымальнік, які мае ліцэнзію.

У міліцэйскіх зводках нямала гісторыяў і з затрыманнем наладаваных металаломам машын паблізу беларуска-расійскай мяжы. Іх затрымліваюць, калі ўладальнікі грузаў не маюць дакументаў з дазволам на вываз металалому за мяжу. Лом канфіскуецца, а ўладальніка штрафуюць. У суседнюю краіну вязуць метал, бо закупныя цэны на яго там вышэйшыя. Для законнага вывазу металу таксама трэба мець дазвол.

У Веткаўскім раёне двое беспрацоўных разабралі мост

Работнік трэнажорнай залы скраў гантэлі і здаў на металалом, а ўладальнік збіў яго

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера