Знайсці
19.11.2022 / 22:135РусŁacБел

Партызаны з Херсона распавялі, як змагаліся з расійскай уладай

Некалькі ўдзельнікаў украінскага падполля ў Херсоне распавялі, як сталі партызанамі, якія заданні выконвалі, і чаму расійскія вайскоўцы не маглі атрымаць ніякай каштоўнай інфармацыі нават пасля таго, як лавілі партызан. Гэта адзін з рэдкіх выпадкаў, калі частка герояў публікацыі мела зносіны з журналістамі не ананімна: не называючы іх прозвішчы, выданне паказвае твары, піша «Агентство. Новости» са спасылкай на The Washington Post.

Херсон, 13 лістапада 2022 года. Фота: АР

Адзін з суразмоўцаў выдання назваўся Ігарам. Паводле яго слоў, ён нават не ведаў вярбоўшчыка па імені. Той толькі сказаў, што служыць у сілах спецыяльных аперацый Украіны (уваходзяць ва УСУ), і спытаў, ці хоча Ігар дапамагчы змагацца з рускімі. «Запішыце мяне», — адказаў Ігар.

Каардынатар з пазыўным «Дым» прасіў Ігара перадаць геалакацыю размяшчэння расійскіх вайскоўцаў і іх складоў зброі, перахаваць схованкі са зброяй і выбухоўкай. «Дым» казаў, што Ігар павінен быць гатовы прыняць удзел у вулічных баях, калі яны будуць весціся пры вызваленні Херсона.

 Улетку Ігар атрымаў некалькі заданняў перахаваць схованкі са зброяй і ў канцы жніўня быў злоўлены расійскімі вайскоўцамі. Ён правёў 11 дзён у следчым ізалятары, дзе, паводле звестак The Washington Post, катавалі зняволеных. Адсюль мужчыну адпусцілі пры ўмове, што пра свае кантакты з украінскімі спецслужбамі ён будзе дакладваць расійскім вайскоўцам. Аднак наўрад ці такім чынам расіяне змаглі даведацца нешта каштоўнае: у Ігара з яго каардынатарам быў таемны код. Папярэджаннем аб небяспецы мог быць адказ «ок» замест «добра».

Херсон, 13 лістапада 2022 года. Фота: АР

У верасні, па словах Ігара, ён зняў на відэа некалькі грузавікоў расійскіх вайскоўцаў, якія былі прыпаркаваны на аўтастаянцы пры выездзе з горада. Мужчына зрабіў выгляд, што размаўляе па тэлефоне, прыклаўшы яго да вуха, у той час як камера запісвала ўсё, што адбываецца. Праз пару дзён па гэтым месцы УСУ нанеслі артылерыйскі ўдар.

З «Дымам» Ігар упершыню сустрэўся ўжо пасля адыходу расійскай арміі з горада.

У Службы бяспекі Украіны таксама былі свае людзі ў акупаваным Херсоне. Як пішуць журналісты, адна з іх — мясцовая чыноўніца Ірына. Падчас акупацыі яна рэгулярна перадавала ўкраінскім спецслужбам інфармацыю пра тое, як уладкаваная створаная расіянамі адміністрацыя і хто з мясцовых жыхароў з ёй супрацоўнічае.

Херсон, 13 лістапада 2022 года. Фота: АР

Аднойчы да Ірыны дадому прыйшлі іншыя партызаны і папрасілі ў яе дазволу закапаць побач з яе домам некаторыя рэчы. Пасля сыходу расіян з горада схованку адкапалі — як распавялі Ірыне знаёмыя з СБУ, у ім было тое, што трэба для вытворчасці выбухоўкі.

Два ананімныя ўдзельнікі супраціву, з якімі пагутарыла выданне, распавялі, што забілі некалькі пʼяных расіян, калі тыя ішлі па вуліцы адны. Суразмоўцы газеты сказалі, што наносілі ўдары нажом. Выданне не змагло праверыць іх словы.

 Украінскае падполле, у якім бралі ўдзел як мясцовыя жыхары, так і супрацоўнікі спецслужбаў, сфармавалася не толькі ў Херсонскай вобласці. З пачатку вайны на ўзятых Расіяй пад свой кантроль тэрыторыях былі арганізаваны дзясяткі нападаў на чыноўнікаў, якія супрацоўнічаюць з Расіяй, многія з іх загінулі.

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
6
Марвэл нервова паліць у старонцы/адказаць/
20.11.2022
Ну цяпер усе херсонцы стануць супергероямі...
2
Справка/адказаць/
20.11.2022
[Рэд. выдалена]
0
Пціч/адказаць/
20.11.2022
Рана выкладваць сакрэты. Яшчэ вызваляць ды вызваляць...
Паказаць усе каментары
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера