Пяцігадовага хлопчыка выратавалі ад пітона, які пацягнуў яго на дно басейна
У Аўстраліі на пяцігадовага хлопчыка накінуўся трохметровы пітон — укусіў яго, спрабаваў задушыць і пацягнуў у глыбіню басейна, але дзіця ўдалося выратаваць, піша Бі-бі-сі.
Як распавёў бацька хлопчыка Бэн, Б'ю Блэйк гуляў ля басейна свайго дома, калі вялікая рэптылія накінулася на яго, сціснула кольцамі і зацягнула ў ваду.
Дзядулю хлопчыка ўдалося выцягнуць яго проста з пітона, які абвіўся вакол дзіцяці ў басейне, пасля чаго бацька вызваліў сына з палону рэптыліі.
Б'ю трымаўся малайцом, і ўкусы змяі не былі небяспечнымі для жыцця.
«Пасля таго, як мы змылі ўсю кроў і сказалі Б'ю, што ён не памрэ, бо гэта не ядавітая змяя, ён ужо быў у добрым настроі», — сказаў Бэн у інтэрв'ю радыёстанцыі 3AW у Мельбурне ў пятніцу, на наступны дзень пасля здарэння.
Сям'я жыве ў прыбярэжным горадзе Байран-Бі ў Новым Паўднёвым Уэльсе, на поўнач ад Сіднэя.
«Ён вялікі малайчына!» — дадаў Бэн, адзначыўшы, што яны будуць рэгулярна аглядаць раны хлопчыка, каб не прапусціць прыкметы магчымага заражэння.
Нягледзячы на шчаслівы вынік, сам гэты інцыдэнт стаў для сям'і сур'ёзным выпрабаваннем.
«Сын проста прагульваўся вакол басейна. Думаю, пітон стаіўся дзесьці побач у чаканні ахвяры, якой і стаў Б'ю», — распавёў яго бацька.
«Я ўбачыў вялікі цёмны цень, ён кінуўся з кустоў, і да таго часу, як яны апынуліся на дне басейна, змяя цалкам абвілася вакол ног хлопчыка».
76-гадовы дзядуля Б'ю, Алан, не раздумваючы, кінуўся ў басейн, схапіў хлопчыка з пітонам і тут жа перадаў іх Бэну.
«Я сам даволі буйны, — прызнаўся Бэн. — Так што мне ўдалося вызваліць яго на працягу 15—20 секунд».
Ён трымаў пітона яшчэ хвілін дзесяць, пакуль адчайна спрабаваў супакоіць сваіх дзяцей і бацьку, але потым выпусціў змяю назад у кусты.
«Ён вярнуўся на месца злачынства, бессаромная істота!»— паскардзіўся бацька дзіцяці.
Бэн таксама адзначыў, што пітоны ў гэтай мясцовасці далёка не рэдкасць.
«Ну … гэта ж Аўстралія,» — сказаў ён.
