Зяленскі: На аднаўленне Украіны спатрэбіцца больш за трыльён даляраў
На пасляваеннае аднаўленне Украіны прыйдзецца выдаткаваць больш за трыльён даляраў. Пра гэта заявіў прэзідэнт Украіны Уладзімір Зяленскі ў відэазвароце да Генеральнай асамблеі Міжнароднага бюро выстаў, прадстаўляючы заяўку Адэсы на правядзенне «Экспа-2030», паведамляе meduza.io.
Фота: AP
Паводле слоў прэзідэнта, цяпер ва Украіне распрацоўваецца сістэма, якая дазваляе краінам-партнёрам «узяць шэфства» над рэгіёнамі, гарадамі ці прадпрыемствамі. «Мы ўжо бачым цікавасць [да гэтай праграмы] з боку Францыі, Вялікабрытаніі, Нідэрландаў, Германіі, Даніі, Фінляндыі, Італіі, Турцыі, Польшчы, Партугаліі, Чэхіі, Славеніі, Латвіі, Эстоніі, Швейцарыі, Славакіі, Аўстрыі, Грэцыі, Канады, ЗША, Японіі і Аўстраліі. І гэта яшчэ не поўны спіс», — распавёў Зяленскі.
Улетку 2022 года ўлады Украіны ацэньвалі выдаткі на аднаўленне краіны ў 750 мільярдаў даляраў. Аднак восенню Расія пачала наносіць масіраваныя ўдары па ўкраінскіх гарадах, мэтай якіх стала энергасістэма Украіны.
