Еўрапал ліквідаваў сетку арганізатараў нелегальнай міграцыі з Беларусі ў Еўрасаюз

Спецслужбы Польшчы, Эстоніі, Германіі, Літвы і Латвіі ў рамках сумеснай аперацыі ліквідавалі злачынную сетку, якая арганізавала незаконную перапраўку мігрантаў з Беларусі ў краіны Еўрасаюза. Пра гэта паведаміла польская памежная служба.

У рамках крымінальнай справы пагранатрад затрымаў 8 грамадзян Польшчы, 9 — Украіны, 2 — Туніса, 2 — Грузіі, па 1 грамадзяніне Ірака і Беларусі. Усяго 23 чалавекі. Агульная ж колькасць затрыманых дасягнула 61 чалавек.

Злачынная група дзейнічала з восені 2021 года і перавозіла іншаземцаў у Германію і Вялікабрытанію праз Польшчу. Кошт падобнага «тура», па інфармацыі польскага памежнага ведамства, складаў да 15 тыс. еўра з чалавека. Члены групоўкі зарабілі на гэтым каля 16 млн еўра.