Чатыры чалавекі загінулі падчас пажару ў Смаргоні
Сёння ўначы ў Смаргоні па вуліцы Чырвонаармейскай згарэў прыватны жылы дом, падчас пажару загінулі людзі, паведамляе МНС Гродна.
«Драўляны будынак гарэў знутры, полымя выбівалася на дах, — расказалі ў МНС. — Да нашага прыбыцця мясцовы жыхар увайшоў у дом і вынес на вуліцу жанчыну ў непрытомным стане. Брыгада хуткай дапамогі шпіталізавала выратаваную ў цэнтральную раённую бальніцу. Стан цяжкі».
Пры правядзенні разведкі ў адным з пакояў ратавальнікі выявілі чатыры нежывыя целы: 37-гадовай жанчыны, 36-гадовага гаспадара дома і двух мужчын 38 і 37 гадоў.
Агнём былі пашкоджаныя рэчы ў пакоі, перакрыцці, дах і сцены. Усталяваннем прычыны і абставін здарэння займаюцца супрацоўнікі Следчага камітэта. Найверагодней, да трагедыі прывяло неасцярожнае курэнне.