Для жыхароў прызначаных пад знос прыватных дамоў у Мінску будуць адразу будаваць жыллё ў тым жа раёне
У Мінску плануюць спачатку будаваць дамы для таго, каб перасяліць людзей, а толькі потым ачышчаць запланаваныя плошчы, паведаміла агенцтву «Мінск-Навіны» начальніца ўпраўлення жыллёвай палітыкі Мінгарвыканкама Алена Лукашэвіч.
«Каб мець магчымасць будаваць новыя кварталы і не ўшчамляць у правах грамадзян, якія ў большасці сваёй хочуць застацца ў тым жа самым раёне, Мінгарвыканкам прыняў рашэнне ў першую чаргу пры засваенні кварталаў узводзіць дамы на тых месцах, дзе мяркуецца знос», — заявіла яна.
Закране гэта перш за ўсё дамы ў мікрараёне Лошыца, на Лагойскам тракце і вуліцах Валгаградскай, Сярова, Розы Люксембург, Сталетава і Філімонава.
«У першую чаргу будуць узводзіцца дамы, куды пераселяцца людзі, а далей — ачышчацца пляцоўкі», — паабяцала Лукашэвіч.
Чытайце таксама:
У чарзе на паляпшэнне жыллёвых умоў у Мінску — 179 тысяч сем'яў
У 2022 годзе ў Мінску набылі рэкордную колькасць кватэр
Стала вядома, якія дамы з'явяцца на месцы так і не дабудаванага ГЦ «Гулівер»
